រាជធានីភ្នំពេញ៖គ្រោះថ្នាក់ចរាចរណ៍នៅទូទាំងប្រទេសក្នុងខែតុលាកន្លងទៅនេះ កើតឡើងចំនួន២៨១លើកបណ្តាលឲ្យមនុស្ស១២៤នាក់បានស្លាប់ របួស៦៥៦នាក់ (របួសស្រាល ៣០៩នាក់ និងរបួសធ្ងន់ ៣៤៧នាក់)។ នេះបើតាមរបាយការណ៍របស់អគ្គស្នងការនគរបាលជាតិ។
របាយការណ៍ដដែលបញ្ជាក់ថា ក្នុងគ្រោះថ្នាក់ចរាចរណ៍ពេញមួយខែតុលានេះចំនួនអ្នកស្លាប់បានធ្លាក់ចុះបើធៀបនឹងរយៈពេលដូចគ្នាឆ្នាំ២០១៥ កើតឡើង ២៧៥លើក អ្នកស្លាប់១៣៣នាក់ ខណៈដែលអ្នករបួសកើនឡើងបើធៀបនឹងឆ្នាំមុន ដែលមានអ្នករបួសចំនួន ៤៣៥នាក់ (របួសស្រាល ១៦៤ នាក់ និងធ្ងន់ ២៧៣នាក់)។
គ្រោះថ្នាក់ចរាចរណ៍ទាំង ២៨១លើកបណ្តាលឲ្យខូចខាតរថយន្តតូច១០២គ្រឿង រថយន្តធំ ៥៧គ្រឿង និងម៉ូតូ ២៩២គ្រឿង ហើយមូលហេតុដែលនាំឲ្យគ្រោះថ្នាក់រួមមាន ល្មើសល្បឿន ស្រវឹង ប្រជែង មិនប្រកាន់ស្តាំ មិនគោរពសិទ្ធិ ងងុយដេក និងកត្តាយានយន្តជាដើម៕
