ម៉ុងតាញ៉ាមួយក្រុមថ្មីទៀតស្វែងរកជំនួយសង្គ្រោះពីក្នុងព្រៃខេត្ត រតនគិរី

ដោយ មេគង្គ ប៉ុស្តិ៍ ចេញផ្សាយ ថ្ងៃទី 6 January, 2015 ក+ ក-

ខេត្តរតនគិរី៖ក្រុមជនជាតិដើមភាគ តិចចារ៉ាយ រស់នៅភាគ កណ្ដាលប្រទេសវៀតណាម ឬក្រុមម៉ុងតាញ៉ា ចំនួន ៥នាក់ថ្មីទៀត អំពាវនាវស្វែងរកជំនួយសង្គ្រោះពីមន្ត្រីឧត្ដមស្នងការអង្គការ សហប្រជាជាតិផ្នែកសិទ្ធិមនុស្សនៅកម្ពុជា ខណៈពួកគេបានរត់ភៀសខ្លួនចេញពីស្រុកកំណើតមកសុំសិទ្ធិជ្រកកោន ផ្នែកនយោបាយ។

ការអំពាវនាវនេះធ្វើឡើងតាមរយៈរូបថតមួយសន្លឹកដែលប្រជាពលរដ្ឋ ជនជាតិដើមភាគតិចខ្មែររស់នៅជាប់ព្រំដែនប្រទេសវៀតណាម ក្នុងស្រុកអូរយ៉ាដាវ ខេត្តរតនគិរី បានប្រទះឃើញហើយថតរូបជនភៀសខ្លួនទាំងនោះផ្ញើមកការិយាល័យអង្គការ សិទ្ធិមនុស្សខេត្តរតនគិរី នៅយប់ថ្ងៃទី៥ ខែមករា ដើម្បីស្វែងរកជំនួយសង្គ្រោះ។

អ្នកភូមិខ្មែរសុំមិនឲ្យបញ្ចេញឈ្មោះ ឲ្យដឹងថា ជនភៀសខ្លួន ៥នាក់នេះមកពីភូមិចំនួនបី គឺភូមិសូល ភូមិម៉ក់ដែង និងភូមិប៉ល ក្នុងស្រុកដាក់កឺ ខេត្តយ៉ាឡាយ។ ពួកគេបានភៀសខ្លួនចូលមកក្នុងព្រៃខេត្តរតនគិរី តាំងពីថ្ងៃទី៣ ខែមករា ក្រោមហេតុផលរងការគាបសង្កត់ធ្វើទុក្ខបុកម្នេញផ្នែកជំនឿសាសនា និងបញ្ហានយោបាយពីអាជ្ញាធរមូលដ្ឋានក្នុងប្រទេសវៀតណាម។

អ្នកភូមិដដែលឲ្យដឹងដែរថា ពួកគេកំពុងលាក់ខ្លួនក្នុងព្រៃមិនហ៊ានបង្ហាញខ្លួនឲ្យអាជ្ញាធរខេត្ត រតនគិរី ឃើញដោយភ័យខ្លាចអាជ្ញាធរកម្ពុជា ចាប់បញ្ជូនទៅឲ្យអាជ្ញាធរវៀតណាមវិញ៖ «គាត់ត្រូវការអង្គការ យូ.អិន.អេច្ឆ.ស៊ី.អា (UNHCR) និងខាងរដ្ឋាភិបាលអន្តរាគមន៍សង្គ្រោះគាត់ជាបន្ទាន់ ព្រោះនៅក្នុងព្រៃមូសខាំ អត់ទឹក។ គាត់អត់ហ៊ានចេញខ្លាចសមត្ថកិច្ចចាប់បញ្ជូនទៅវៀតណាមវិញ»។

ទាក់ទិនសេចក្ដីអំពាវនាវនេះស្នងការរងប៉ូលិសខេត្តរតនគិរី លោក អ៊ឹម ផានី មានប្រសាសន៍បញ្ជាក់ថា ប៉ូលិសមិនទាន់ទទួលបានសេចក្ដីរាយការណ៍នេះទេ។ លោកអះអាងថា នឹងរាយការណ៍ជូនស្នងការប៉ូលិសប្រសិនពិតជាមានវត្តមានជនភៀសខ្លួនថ្មី ក្នុងខេត្តនេះ៖ «អាហ្នឹងទាល់តែរាយការណ៍ឲ្យស្នងការហើយតើគាត់មានគោលការណ៍យ៉ាងម៉េច?»។

ចំណែកអ្នកនាំពាក្យអាជ្ញាធរខេត្តរតនគិរី លោក ញ៉ែម សំអឿន ឲ្យដឹងដែរថា អាជ្ញាធរខេត្តនឹងធ្វើរបាយការណ៍ជូនក្រសួងមហាផ្ទៃ ប្រសិនមានជនភៀសខ្លួនវៀតណាម ចូលមកទឹកដីខេត្តរតនគិរី មែន។
លោកបន្តថា អាជ្ញាធរខេត្តមានរបាយការណ៍នេះហើយ៖ «យើងមិនដឹងថា យ៉ាងម៉េចទេ គ្រាន់ដឹងថា យើងមានរបាយការណ៍ យើងនឹងរាយការណ៍ទៅក្រសួងអាណាព្យាបាលដើម្បីចាត់វិធានការ»។

កាលពីខែធ្នូ ឆ្នាំ២០១៤ ក្រុមម៉ុងតាញ៉ា ១៣នាក់ ត្រូវបានមន្ត្រីក្រុមការងារឧត្ដមស្នងការអង្គការសហប្រជាជាតិផ្នែក សិទ្ធិមនុស្សប្រចាំកម្ពុជា សហការជាមួយមន្ត្រីនាយកដ្ឋានជនភៀសខ្លួនក្រសួងមហាផ្ទៃ សង្គ្រោះពីខេត្តរតនគិរី នាំមកទីក្រុងភ្នំពេញ ដើម្បីពិនិត្យលើការសុំសិទ្ធិជ្រកកោនរបស់ពួកគេជាជនភៀសខ្លួន ផ្នែកនយោបាយ។

យ៉ាងនេះក្តីមន្ត្រីឃ្លាំមើលសិទ្ធិមនុស្សសមាគមអាដហុក (Adhoc) ខេត្តរតនគិរី លោក ឆាយ ធី អះអាងថា លោកបានទទួលរូបថតក្រុមជនភៀសខ្លួនទាំងប្រាំនាក់ដែលកំពុងលាក់ខ្លួន ក្នុងព្រៃ រួមទាំងបានផ្ដល់ព័ត៌មានទាក់ទិនការសុំសិទ្ធិជ្រកកោនរបស់ពួកគេទៅ មន្ត្រីអង្គការសិទ្ធិមនុស្សអង្គការសហប្រជាជាតិរួចហើយ។

លោកបន្តថា មន្ត្រីអង្គការសហប្រជាជាតិកំពុងសុំកិច្ចសហការពីក្រសួងមហាផ្ទៃ មកបំពេញបេសកកម្មនៅខេត្តរតនគិរី ទាក់ទិននឹងការសង្គ្រោះជនភៀសខ្លួនថ្មីនេះ៖ «បានទទួលព័ត៌មាន យប់មិញ និងរូបថតតាមរយៈទូរស័ព្ទក្រុមជនភៀសខ្លួនប្រាំនាក់ហ្នឹងស្នើសុំ ឲ្យមានកិច្ចអន្តរាគមន៍ពីអង្គការសហប្រជាជាតិ ពួកគាត់កំពុងសម្ងំលាក់ខ្លួនក្នុងព្រៃ»។

មន្ត្រីសិទ្ធិមនុស្សខេត្តរតនគិរី លោក ឆាយ ធី រាយការណ៍ថា កាលពីចុងសប្ដាហ៍មុនប្រជាពលរដ្ឋនៅឃុំប៉ក់ញ៉ៃ ស្រុកអូរយ៉ាដាវ ជាប់នឹងព្រំដែនខេត្តយ៉ាឡាយ ប្រទេសវៀតណាម អះអាងថា មានជនជាតិម៉ុងតាញ៉ា វៀតណាម ២នាក់ ឆ្លងដែនចូលមកដីខ្មែរឋិតក្នុងភូមិឡំកន ឃុំប៉ក់ញ៉ៃ ក៏ប៉ុន្តែពួកគេត្រូវប៉ូលិសចាប់បញ្ជូនទៅវិញ។ ជួនគ្នានេះដែរ គេហ ទំព័រអគ្គស្នងការនគរបាលជាតិ ក៏បានរាយការណ៍ដែរថា សមត្ថកិច្ចបានចាប់បញ្ជូនបុរសជនជាតិដើមភាគតិចវៀតណាម ពីរនាក់តាមច្រកទ្វារព្រំដែនអន្តរជាតិស្រុកអូរយ៉ាដាវ ខេត្ត រតនគិរី បន្ទាប់ពីពួកគេលួចឆ្លងដែនខុសច្បាប់ចូលមកកម្ពុជា កាលពីថ្ងៃទី២ ខែមករា៕RFA