ប៉ោយប៉ែត៖ច្រករបៀងខុសច្បាប់មួយកន្លែងស្ថិតនៅខាងលិចកាស៊ីណូហ្គោលឌិនក្រោននិងខាងជើងនៃស្ពានមិត្តភាពកម្ពុជា- ថៃ នៃច្រកអន្តរជាតិប៉ោយប៉ែត ៥០០ម៉ែត្រ ត្រូវនគរបាលអន្តោប្រវេសន៍ច្រកអន្តរជាតិប៉ោយប៉ែតបង្កើតឡើងដើម្បីកឹបកេងយកលុយពីប្រជាពលរដ្ឋដែលលួចចេញទៅប្រទេសថៃ ដោយខុសច្បាប់។
មន្ត្រីប្រចាំការនៅច្រកអន្តរជាតិប៉ោយប៉ែតម្នាក់សុំមិនបញ្ចេញឈ្មោះបានប្រាប់ថា ការបើកច្រករបៀងខុសច្បាប់របស់នគរបាលអន្តោរប្រវេសន៍ដែលគ្រប់គ្រងដោយលោក ស៊ឹម សំអាត នេះត្រួវគេមើល ឃើញថា សម្រាប់បំពេញសេចក្តីត្រូវការរបស់លោក សឹម សំអាត ជាមេប៉ុស្តិ៍ ចំណែកកូនចៅក្រោម ឱវាទបានត្រឹមតែផឹកកាហ្វេខ្មៅ ។
តាមប្រភពផ្សេងទៀតបានឲ្យដឹងថា នៅចំណុចច្រករបៀងនោះដែរ គេឃើញមានមន្ត្រីម្នាក់ស្លៀកពាក់ខោអាវស៊ីវិលអង្គុយគងទាក់ខ្លាលើ ចាំរាប់ពលករខ្មែរឆ្លងដែនខុសច្បាប់ហើទារយកលុយដែលដើរឆ្លកាត់ទាំងចេញទាំងចូលក្នុងប្រទេសថៃ-កម្ពុជា។ អ្នកគ្រប់គ្រងផ្ទាល់ច្រករបៀងខុសច្បាប់នោះឈ្មោះ ប៊ុន សុផា ដែលគេដឹងថាជាមនុស្សជំនិតបំផុតរបស់លោក សឹម សំអាត ។
ប្រភពបន្តថា ក្នុងមួយថ្ងៃៗហោចណាស់មានពលករខ្មែរឆ្លងដែនចេញចូលខុសច្បាប់ចាប់ពី៣០០នាក់ ឡើងទៅដែលត្រូវបង់ប្រាក់ឱ្យមន្ត្រីលោកស៊ឹម សំអាត ពី៣០០ បាតទៅ៥០០បាតក្នុងម្នាក់ៗ។
គួររំលឹកថា កន្លងមកមានពលករខ្មែរឆ្លងដែនខុសច្បាប់តាមច្រករបៀងរបៀបនេះត្រូវបានប្រឈមនឹងគ្រោះថ្នាក់ជាញឹកញាប់ដូចជាត្រូវទាហានថៃបាញ់សម្លាប់ ឬចាប់ដាក់គុក ធ្វើទារុណកម្មជាដើម។
លោក ប៊ុន សុផា ជាអ្នកគ្រប់គ្រងច្រករបៀងខុសច្បាប់នោះបានឆ្លើយប្រាប់អ្នកការសែតកាលពីពេល ថ្មីៗនេះថា រឿងនេះទៅសួរមេរបស់លោកទៅទើបដឹង។ ចំណែកលោក ស៊ឹម សំអាត មេប៉ុស្ថិ៍នគរបាលអន្តោប្រវេសន៍ច្រកអន្តរជាតិប៉ោយប៉ែត បានរុញឲ្យជួបទៅជួបលោក ប៊ុន សុផា វិញព្រោះលោក ជាប់រវល់។
ការរុញទៅរុញមក របស់លោកមេប៉ុស្តិ៍ន៍នគរបានអន្តោរប្រវេសច្រកប៉ោយប៉ែត ត្រូវគេគិតថាទំនងជាលោកស៊ឹម សំអាត ចង់គេចវេសពីការអធិប្បាយពាក់ព័ន្ធនឹងអំពើពុករលួយប្រាប់អ្នកកាសែតក្នុងការបើកច្រករបៀងខុសច្បាប់ និងទារលុយពីប្រជាពលករខ្មែររាប់ម៉ឺនបាត(លុយថៃ)ក្នុងមួយថ្ងៃៗ ក្រោមលេសថាគ្មានលិខិត ស្នាមត្រឹមត្រូវ ៕ ប៊ុន ជេន
