បាល់ទាត់៖ទីភ្នាក់ងារសារព័ត៌មាន independent បានរាយការណ៍ថា តារាឆ្នើមរបស់ក្រុម FC Barcelona កីឡាករ Neymar ត្រូវបានព្រះរាជអាជ្ញាអេស្ប៉ាញបានចេញដីកាកាត់ទោសឲ្យជាប់ពន្ធនាគារ២ឆ្នាំ និងពិន័យជាប្រាក់ ១០,៦លានដុល្លារ ដោយជាប់សង្ស័យរួមចំណែកប្រព្រឹត្ត អំពើពុករលួយពេលរូបគេផ្ទេរពីក្លឹប Santos ទៅក្លឹបអ្នកមានបុណ្យកាលឆ្នាំ២០១៣។
តាមពាក្យបណ្ដឹងរបស់ក្រុមហ៊ុនប្រេស៊ីល DIS ដែលជាម្ចាស់កម្មសិទ្ធិ៤០% នៃសិទ្ធិដោះដូរខ្សែប្រយុទ្ធប្រេស៊ីល Neymar បានបញ្ជាក់ថា ពួកគេបានទទួលប្រាក់តិចជាងអ្វីដែលសាធារណជនបានដឹង ព្រោះក្លឹប Barca បានលាក់បាំងតម្លៃផ្ទេរពិតប្រាកដ។
ជាមួយគ្នានេះព្រះរាជអាជ្ញា Judge Jose Perals ក៏បានចេញដីកា កាត់ទោសអតីតប្រធានក្លឹប Barca លោក Rosell ឲ្យជាប់ពន្ធនាគារ៥ឆ្នាំ និងពិន័យជាប្រាក់៧,១លានដុល្លារ, ឪពុក Neymar (Neymar Sr) ត្រូវជាប់ពន្ធនាគារ២ឆ្នាំ រួមទាំងម្ដាយរបស់គេ Nadine da Silva ត្រូវជាប់ពន្ធនាគារ១ឆ្នាំទៀតផង។
គួររម្លឹកថា កន្លងមកមិត្តរួមក្លឹបកីឡាករ Lionel Messi និង Javier Mascherano ក៏ត្រូវតុលាការកាត់ទោសឲ្យជាប់ពន្ធនាគារ២១ខែ និង១២ខែផងដែរ៕
