តួកគី៖មានការវាយប្រហារតាមអាកាសនៅភាគខាងជើងនៃប្រទេសស៊ីរីកាលពីថ្ងៃព្រហស្បតិ៍ម្សិលមិញបណ្តាលឲ្យទាហានតួកគីចំនួន៣នាក់បានស្លាប់បាត់បងជីវិត ខណៈដែល១០នាក់ទៀតបានរងរបួសគ្រាដែលយោធាតួកគីជឿថា ការវាយប្រហារនេះគឺជាការប្រព្រឹត្តដោយកងកម្លាំងរដ្ឋាភិបាលនៃប្រទេសស៊ីរី។
ទីភ្នាក់ងារព័ត៌មានអាណាដូលូរបស់តួកគីបាននិយាយថា ការវាយប្រហារនេះបានកើតឡើងនៅជិតទីក្រុងអាល់បាបជាទីដែលកងកម្លាំងប្រឆាំងនៅប្រទេសស៊ីរីគាំទ្រដោយប្រទេសតួកគីបាននិងកំពុងព្យាយាមវាយដណ្ដើមទីក្រុងនេះត្រឡប់មកពីក្រុមរដ្ឋអ៊ីស្លាមវិញ។
ក្រុមអ្នកតាមដានជម្លោះនៅប្រទេសស៊ីរីបានបញ្ជាក់ថា ការស្លាប់ទាហាននៃប្រទេសតួកគីទាំងនេះគឺបណ្ដាលមកពីការវាយប្រហារអត្តឃាតរបស់ក្រុមរដ្ឋអ៊ីស្លាមកាលពីថ្ងៃពុធគឺផ្ទុយពីការអះអាងរបស់រដ្ឋាភិបាលតួកគីដែលថាពួកគេបានស្លាប់ដោយការវាយប្រហារតាមអាកាសពីថ្ងៃម្សិលមិញ។
សកម្មជននៃក្រុមអ្នកស៊ើបអង្កេតសិទ្ធិមនុស្សនៅប្រទេសស៊ីរី លោក រ៉ាមី អាប់ឌូរ៉ាម៉ាន បានបញ្ជាក់ថា ការវាយប្រហារអត្តឃាតនេះបានកើតឡើងកាលពីថ្ងៃពុធនៅតំបន់ជនបទអាល់បាបជិតភូមិវ៉ាហ្គានៃប្រទេសស៊ីរី៕
