ខេត្តកណ្តាល៖ក្មេងប្រុសម្នាក់ត្រូវ ព្រះភូមិ (រានទេវតា) បាក់សង្កត់បណ្តាលឲ្យស្លាប់យ៉ាងអាណោចអាធ័ម គ្រាដែលក្មេងប្រុសរូបនេះទៅលេង ឫតោងរានទេវតានោះ ដែលហេតុការណ៍នេះកើតនៅវេលាម៉ោង១០ និង១៥នាទីព្រឹកថ្ងៃទី១ ខែធ្នូ ឆ្នាំ២០១៦ ស្ថិតនៅចំណុចមុខផ្ទះអ្នកលក់រានទេវតាឈ្មោះ សុខ សម្បត្តិ ស្ថិតក្នុងភូមិព្រែកឫស្សីលិច សង្កាត់ព្រែកឫស្សី ក្រុងតាខ្មៅ ខេត្តកណ្តាល។
សមត្ថកិច្ចមូលដ្ឋានបានឲ្យដឹងថា ម្ចាស់អាជីវកម្ម(លក់រានទេវតា) ឈ្មោះ សុខ សម្បត្តិ ភេទប្រុសអាយុ៤២ឆ្នាំ ស្រុកកំណើត ភូមិព្រែកស្ដី ឃុំព្រែកស្ដី ស្រុកកោះធំ ខេត្តកណ្ដាល បច្ចុប្បន្នស្នាក់នៅផ្ទះជួលកន្លែងកើតហេតុខាងលើ មុខរបរលក់រានទេវតាបានគេចខ្លួន) និងប្រពន្ធឈ្មោះ សុប សូរី អាយុ៣៧ឆ្នាំ ស្រុកកំណើត ភូមិព្រែកស្តី ឃុំព្រែកស្តី ស្រុកកោះធំ ខេត្តកណ្តាល មុខរបរលក់រានទេវតា។ ចណែកក្មេងប្រុសរងគ្រោះឈ្មោះ កុសល វិសាល ជាសិស្សសាលា មានអាយុ៨ឆ្នាំ។ សមត្ថកិច្ចបន្តថា ក្មេងរងគ្រោះបានចេញពីផ្ទះដើរឆ្លងកាត់ ទីនោះជារៀងរាល់ថ្ងៃ ហើយពេលដើរមកដល់កន្លែងចំណុចកើតហេតុ គឺគាត់ចេះតែតោងលេងមិនដែលមានបញ្ហាអ្វីទេ លុះមកដល់ថ្ងៃ កើតហេតុក្មេងរងគ្រោះប្រហែលជានៅតោងលេងយូរ បានជាបង្កឲ្យមានគ្រោះថ្នាក់បែបនេះតែម្ដងទៅ។
តាមការពិនិត្យវិភាគ របស់ជំនាញសាកសពក្មេងរងគ្រោះដែលស្លាប់នេះ គឺបណ្ដាលមកពីការតោងយោគ រានទេវតានោះទើបធ្លាក់សង្កត់ចំក្បាលស្លាប់ដោយខ្លួនឯង ពិតប្រាកដមែន។ ចំណែកឯសាកសពគឺត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
