កូរ៉េខាងត្បូង៖គណបក្សកំពុងកាន់អំណាចរបស់ប្រទេសកូរ៉េខាងត្បូងនៅថ្ងៃព្រហស្បតិ៍នេះបានជំរុញឲ្យលោកប្រធានាធិបតី Park Geun-Hye ដែលរងគ្រោះដោយរឿងអាស្រូវត្រូវចុះចេញពីតំណែងនៅខែមេសាឆ្នាំក្រោយដោយផ្តល់ពេលឲ្យលោកស្រីមួយសប្តាហ៍ដើម្បីទទួលយកឱសានវាទបើមិនដូច្នោះទេនឹងប្រឈមមុខនឹងការចោទប្រកាន់។
នៅសប្តាហ៍នេះ លោកស្រី Park បានឲ្យដឹងថា លោកស្រីអាចនឹងមានឆន្ទៈចុះចេញពីតំណែងបន្ទាប់ពីស្ថិតក្រោមសម្ពាធយ៉ាងធំសម្បើមដោយសារតែរឿងអាស្រូវដែលបានបង្កឲ្យមានការតវ៉ាតាមដងផ្លូវពីសំណាក់ប្រជាជនរាប់លាននាក់។
តំណាងរាស្ត្រចំនួន១២៨រូបរបស់គណបក្ស Saenuri ដែលកំពុងកាន់អំណាចបានយល់ព្រមជាឯកច្ឆ័ន្ទដើម្បីទាមទារឲ្យលោកស្រី Park លាលែងពីតំណែងនៅចុងខែមេសានិងបានអំពាវនាវឲ្យមានការបោះឆ្នោតប្រធានាធិបតីមួយត្រូវបានធ្វើឡើងនៅខែមិថុនាដែលមានរយៈពេលប្រាំមួយខែមុនមុនការគ្រោង។
លោកស្រី Park បាននិយាយកាលពីថ្ងៃអង្គារថា លោកស្រីនឹងអនុញ្ញាតឲ្យរដ្ឋសភាសម្រេចពីជោគវាសនារបស់លោកស្រីបន្ទាប់ពីមានការចោទប្រកាន់ថាលោកស្រីបានឃុបឃិតជាមួយនាង Choi Soon-sil ដើម្បីបង្ខំឲ្យក្រុមហ៊ុននានាត្រូវបរិច្ចាគទឹកប្រាក់រាប់សិបលានដុល្លារទៅឲ្យគ្រឹះស្ថានដែលត្រូវបានប្រើប្រាស់សម្រាប់ផលចំណេញផ្ទាល់ខ្លួនរបស់នាង Choi ។
លោកស្រី Park ត្រូវបានគេដាក់ឈ្មោះថាជាជនសង្ស័យម្នាក់នៅក្នុងការស៊ើបអង្កេតមួយដែលធ្វើឲ្យលោកស្រីក្លាយជាប្រធានាធិបតីកំពុងកាន់តំណែងដំបូងគេដែលក្លាយជាប្រធានបទនៃការស៊ើបអង្កេតព្រហ្មទណ្ឌ។
បើទោះបីជាសេចក្តីប្រកាសរបស់លោកស្រី Park បានកាត់បន្ថយសន្ទុះនៃការអំពាវនាវដើម្បីចោទប្រកាន់លោកស្រីក៏ដោយ គណបក្សប្រឆាំងដ៏ធំបានទទូចថា លោកស្រី Park គួរត្រូវបានដកហូតតំណែងនៅត្រឹមចុងបញ្ចប់នៃខែមករាខាងមុខនេះ៕
