រាជធានីភ្នំពេញ៖លោក សម រង្ស៊ី ប្រធានគណបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេស បានថ្លែងការកោតសរសើរ បញ្ជីឈ្មោះអ្នកបោះឆ្នោតថ្មីថា ល្អប្រសើរជាងបញ្ជីឈ្មោះអ្នកបោះឆ្នោតចាស់ ទាំងបរិមាណ និងគុណភាព។
Facebook របស់លោក សម រង្ស៊ី នៅព្រឹកនេះបានសរសេរថា ៖ ជាសន្និដ្ឋានប្រៀបធៀបទៅនឹងបញ្ជីឈ្មោះ អ្នកបោះឆ្នោតចាស់ (២០១៣) បញ្ជីឈ្មោះអ្នកបោះឆ្នោតថ្មី (២០១៦) ល្អប្រសើរជាងឆ្ងាយណាស់ គិតទាំងបរិមាណ ទាំងគុណភាព។ កត្តាជាមូលដ្ឋាននេះ ជាហេតុធ្វើឲ្យការបោះឆ្នោត ឆ្នាំ២០១៧ និង ២០១៨ នឹងមានលក្ខណៈល្អប្រសើរជាងការបោះឆ្នោតឆ្នាំ២០១៣ ឆ្ងាយណាស់»។
លោក សម រង្ស៊ី បន្ថែមថា «ទោះជាពលរដ្ឋខ្មែរជាង១លាននាក់ មិនបានចុះឈ្មោះបោះឆ្នោតថ្មីៗនេះ ដោយសារតែស្នាក់នៅក្រៅប្រទេស ក៏យើងអាចសប្បាយរីករាយ អំពីលទ្ធផលសរុបនៃដំណើរការចុះឈ្មោះអ្នកបោះឆ្នោត ក្នុងរយៈពេល ៣ ខែកន្លងមកនេះ»។ លោកបានបន្ថែមថា «ខ្ញុំសូមកោតសរសើរអស់ពីដួងចិត្ត ចំពោះពលរដ្ឋខ្មែរគ្រប់រូប ដែលបានខិតខំទៅចុះឈ្មោះឲ្យទាល់តែបាន ដើម្បីរក្សាសិទ្ធិបោះឆ្នោតរបស់ខ្លួន ហើយបំពេញកាតព្វកិច្ចរបស់ខ្លួន ក្នុងនាមជាពលរដ្ឋពេញលក្ខណៈ»៕
