ខេត្តកំពង់ធំ៖ ការបាត់បង់ទីតាំងដីអតីតទីសត្តឃាតដ្ឋានស្រុកស្ទោងដែលជាទ្រព្យសម្បត្តិសាធារណៈរបស់រដ្ឋក្រោមស្លាកកិច្ចសន្យាវិនិយោគចំណតរថយន្តស្រុកស្ទោង នោះ ត្រូវបានគេទម្លាយឲ្យដឹងថា ផ្តើមចេញពីការឃុបឃិតគ្នាជាខ្សែចង្វាក់មានតាំងពីជំនាន់លោកសុខ សុផល ប្រធានមន្ទីរសេដ្ឋកិច្ចហិញ្ញវត្ថុខេត្តកំពង់ធំ និងលោក ម៉ៅ ឡាំង អតីតប្រធានមន្ទីរសាធារណៈនិងដឹកជញ្ជូនខេត្តលោកអភិបាលស្រុកស្ទោង ព្រឹម រដ្ឋា និងលោក ឈុន ងួនហេង ដែលជាអ្នកម៉ៅការចំណតរថយន្តបន្តពីលោក អ៊ាង អាន(ម្ចាស់ដើមនៃកិច្ចសន្យាវិនិយោគ) រួមនិងមន្ត្រីខ្លះនៃក្រសួងសេដ្ឋកិច្ច និងហិរញ្ញវត្ថុ ផងដែរ ។
ប្រភពព័ត៌មានពីមន្ត្រីមួយរូបសុំមិនបញ្ចេញឈ្មោះបានដឹងថា នៅមុនពេលថៅកែឈ្មោះ អ៊ាង អាន ចុះកិច្ចសន្យាវិនិយោគរយៈពេល ១៥ឆ្នាំ ចាប់ពីថ្ងៃទី ០១ មករា ឆ្នាំ២០០០ ដល់ ថ្ងៃទី ៣១ ធ្នូ ឆ្នាំ ២០១៤ នោះ គឺទីតាំងចំណតរថយន្តស្រុកស្ទោងមានផ្ទៃដីសរុប ០, ៩០៥ហិកតា ។ក្រោយពីថៅកែ អ៊ាង អាន ទទួលបានសិទ្ធិវិនិយោគរួចមក រូបគាត់មិនបានធ្វើដោយផ្ទាល់ដៃទេគឺផ្ទេរការងារវិនិយោគនេះទៅឲ្យថៅកែម្នាក់ទៀតឈ្មោះ ឈុន ងួនហេង គ្រប់គ្រងរហូតដល់ចប់កិច្ចសន្យាជាមួយរដ្ឋរយៈពេល១៥ឆ្នាំ(២០០០-២០១៤)។
ប្រភពដដែលបន្តថា នៅក្នុងរយៈពេលនៃការគ្រប់គ្រងចំណតរថយន្តស្រុកស្ទោងដោយលោក ឈុន ងូនហេង នោះ គេឃើញមានការពុះច្រៀកដីលក់ និងសាងសង់ស្ថានីយ៍ប្រេងឥន្ធនៈផ្ទុយទៅនឹងគម្រោងកិច្ចសន្យាទៅវិញ។ នៅឆ្នាំ ២០១៣ ដីចំណតរថយន្តដែលនៅសេសសល់ ក៏ត្រូវគេឃុបឃិតគ្នាលក់បន្ថែមទៅឲ្យមនុស្សម្នាក់ឈ្នោះ ជា សុគន្ធារី ក្នុងតម្លៃរាប់សែនដុល្លារ។ប្រភពបន្តថា ក្នុងចន្លោះពេលនេះដែរ លោក អ៊ាង អាន និងលោក ឈុន ងួនហេង មិនបានអភិវឌ្ឍន៍ចំណតនោះទេ គឺចំណតកាន់តែរួមតូច ការចូលចតរបស់យានយន្តពាសវាលពាសកាលហៀរទៅចតនៅតាមចិញ្ចើមថ្នល់សាធារណៈទៅវិញ។
ប្រភពបន្តទៀតថា ទោះបីជាការអនុវត្តកិច្ចសន្យាវិនិយោគពោរពេញទៅដោយភាពមិនប្រក្រតីបែបនេះក្តី ក៏គ្មានសមត្ថកិច្ចថ្នាក់ណាអើពើដែរ ព្រោះគេស៊ុមគ្រលុំគ្នាតាំងពី ថ្នាក់ដឹកនាំខេត្តរហូតដល់មន្ទីរជំនាញក្នុងខេត្តដែលមានសមត្ថកិច្ចគ្រប់គ្រងទ្រព្យសម្បត្តិដែលមានក្នុងបញ្ជីសារពើភ័ណ្ឌរបស់រដ្ឋ ក្នុងនោះមានលោកប្រធានមន្ទីរសេដ្ឋកិច្ចនិងហិរញ្ញវត្ថុ សុខ សុផល លោក ជា គឹមតុង ប្រធានការិយាល័យចំណូលសាធារណៈ នៃនាយកដ្ឋានទ្រព្យសម្បត្តិរដ្ឋ ក្រសួងសេដ្ឋកិច្ច និងហិរញ្ញវត្ថុ រួមនិងមន្ត្រីពាក់ព័ន្ធមួយចំនួនទៀត។
ប្រភពបន្ថែមថា នៅចុងឆ្នាំ២០១៤ ខណៈដែលចំណតរថយន្តជិតផុតកំណត់នៃកិច្ចសន្យាវិនិយោគនោះ លោក ឈុន ងួនហេង បានចេញមុខស្នើសុំការវិនិយោគបន្តរយៈពេល២០ឆ្នាំ គិតពីថ្ងៃទី ០១ មករា ឆ្នាំ២០១៥ ដល់ថ្ងៃទី ៣១ ធ្នូ ឆ្នាំ ២០៣៤ ដោយដាក់ទុនចំនូន ១០០លានរៀល និងបង់ថវិកាចូលខេត្ត ១៥,៨លានរៀល ។កិច្ចសសន្យានេះ ក៏មានការចូលរួមគាំទ្រពីសំណាក់លោក សុខ សុផល ផងដែរ ។
តាមដំណឹងដែលអាចជឿទុកចិត្ត បានឲ្យដឹងថា មានមន្ត្រីពីរបីនាក់ឈ្មុសឈ្មុលរត់ការ«ឡបប៊ី» រហូតដល់ក្រសួងសេដ្ឋកិច្ច និងហិរញ្ញវត្ថុបានយល់ព្រម។គេបានដឹងថា នៅមុនពេលមានការយល់ព្រមនោះ ពួកគេបានរៀបចំនូវសេនារីយោដាក់ឲ្យមានគណៈប្រតិ ភូមួយក្រុមរបស់អគ្គនាយករដ្ឋបាលចុះទៅត្រួតពិនិត្យទំហំផ្ទៃដីចំណតរថយន្តនោះ ប៉ុន្តែក្រោយពីពិនិត្យក៏មិនឃើញមានការចាប់អារម្មណ៍ប្រតិកម្មពីចំពោះករណីចំណតដែលរួមតូចដោយសារគេពុះជ្រៀកលក់នោះទេ។
ការស្ងៀមស្ងាត់របស់ថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ ត្រូវគេគិតថា អង្គុយចាំតែស្តាប់របាយការណ៍ភូត ឬត្រូវថ្នាំសណ្តំពីមន្ត្រីថ្នាក់ក្រោមប៉ុណ្ណោះ ព្រោះភាពមិនប្រក្រតីនៃការវិនិយោគចំណតរថយន្តស្រុកស្ទោងខេត្តកំពង់ធំ នេះមានច្រើន ករណី ប៉ុន្តែគេធ្វើមិនដឹងមិនឮ ។នេះគេមិនទាន់និយាយដល់ការបង្ខំទារយកថ្លៃភាស៊ីលើសពីសៀវភៅបន្ទុកនោះផងទេ។
តាមឯកសារដែលសារព័ត៌មាន សង្គម និងកីឡា ទទួលបាននាពេលថ្មីៗនេះ បង្ហាញថា ទីតាំងដីដែលរដ្ឋប្រគល់ទៅឲ្យលោក អ៊ាង អាន មានទំហំ ០,៩០៥ហិកតា ដើម្បីធ្វើការវិនិយោគសាងសង់ចំណតរថយន្តស្រុកស្ទោងឲ្យបានល្អប្រសើរទាំងសោភ័ណ្ឌភាព និងសុវត្ថិភាព ។ ប៉ុន្តែបែរជាមានការឃុបឃិតគ្នាសុំផ្លាស់ប្តូរទីតាំងចំណតចាស់របស់រដ្ឋដែលត្រូវប៉ាន់ ទៅធ្វើនៅលើដីដែលជាកម្មសិទ្ធិឯកជនរាងជាអក្សរវ៉េ មានហាងឆេងទាបរបស់លោក អ៊ាង អាន ដែលមានចម្ងាយពីគ្នាប្រហែល១០០ម៉ែត្រទៅវិញ ក្រោមលេសថា ទីតាំងចាស់នោះប៉ះពាល់នឹងចំណីផ្លូវ ។កិច្ចព្រមព្រៀងឲ្យមានការផ្លាស់ប្តូរនេះគេឃើញមានចំណាររបស់អភិបាលខេត្តលោក ណាំ ទុំ ចុះថ្ងៃទី២៥ ខែកក្កដា ឆ្នាំ២០០៤ ផងដែរ ។ក្រោយពីមានការផ្លាស់ប្តូររួច ដីដែលនៅសេសសល់លើទីតាំងចាស់ត្រូវគេពុះច្រៀកលក់ដូចការរៀបរាប់ខាងលើ។
ឯកសារដដែលបង្ហាញថា យោងតាមកិច្ចប្រជុំកាលពីថ្ងៃទី២៤ ខែធ្នូ ឆ្នាំ២០១៤ ដែលដឹកនាំដោយលោក សុខ លូ អភិបាលរងខេត្តកំពង់ធំ គឺរដ្ឋបានយល់ព្រមទទួលយក ដីទីតាំងចំណតរថយន្តថ្មីដែលស្ថិតនៅលើដីជាកម្មសិទ្ធិឯកជនរបស់លោក អ៊ា អាន មានទំហំសរុប៩៥០ម៉ែត្រការ៉េ(មិនទាន់កាត់ចំណីផ្លូវ) ខុសពីទំហំដីចំណតចាស់មានទំហំ ០,៩០៥ ហិកតា។
មន្ត្រីក្នុងខេត្តមួយចំនួនបានលើកឡើងស្រដៀងគ្នាថា សុំឲ្យក្រសួងសេដ្ឋកិច្ច និងហិរញ្ញវត្ថុលុបចោល ឬបដិសេធនូវសំណើរសុំការវិនិយោគលើចំណតរថយន្តស្រុកស្ទោងពីសំណាក់លោក ឈុន ងួនហេង ព្រោះថាការស្នើសុំវិនិយោគខាងលើនេះ គឺពោរពេញទៅដោយអំពើពុករលួយ និងបំបាត់ចំណូលរបស់រដ្ឋយ៉ាងច្រើន ។ លើសពីនោះទៅទៀតវាបានផ្ទុយទៅនិងលិខិតណែនាំរបស់ក្រសួងសេដ្ឋកិច្ចនិងហិរញ្ញវត្ថុ លេខ ៤៩១៨ ស.ហ.រ.អ.ទ.ចចុះថ្ងៃទី ០៩ កក្កដា ឆ្នាំដ ២០១៤ ចុះហត្ថលេខាជួសរដ្ឋមន្ត្រីដោយលោករដ្ឋលេខាធិការ ងី តាយីទៀតផង។
ពាក់ព័ន្ឋនឹងពត៌មាននៃអំពើពុករលួយខាងលើនេះ មិនអាចសុំការពន្យល់បានពីថ្នាក់ដឹកនាំខេត្ត និងស្ថាប័នជំនាញនៅឡើយទេ កាលពីរសៀលម្សិលម៉ិញនេះ៕ សសន
