ធារី ចន្ថាប៊ីន ផ្លាស់ទៅលេងនៅក្លឹបលីគលំដាប់ទី២របស់ថៃ
បាល់ទាត់៖អតីតខ្សែបម្រើភ្នំពេញក្រោន ធារី ចន្ថាប៊ីន បានចុះកុងត្រាលេងនៅក្លឹប Krabi FC លីគទី២ របស់ថៃចំនួន៣ឆ្នាំ ជាផ្លូវការហើយ។ នេះបើយោងតាមការបញ្ជាក់ចុងក្រោយអ្នកចាត់ការទូទៅរបស់ក្លឹបក្រសួងការពារជាតិកាលពីម្សិលមិញនេះ។
កីឡាករកូនកាត់ខ្មែរ-បារាំងរូបនេះ បានផុតកុងត្រាពីក្លឹបភ្នំពេញក្រោន ត្រឹមរដូវកាលឆ្នាំ២០១៦។ ក្រោយមកកីឡាកររូបនេះបានទៅធ្វើតេស្តនៅថៃ ទើបជាប់បានលេងនៅក្លឹបនៃលីគទី ២នេះតែម្ដង។
យ៉ាងណាមិញ ធារី ចន្ថាប៊ីន ប្រហែលជាថ្ងៃច័ន្ទនឹងត្រឡប់ទៅថៃវិញ បន្ទាប់ពីបានហ្វឹកហាត់នៅក្លឹបក្រសួងការពារជាតិមួយរយៈពេលខ្លីមកនេះ។ ធារី មកហ្វឹកហាត់នៅក្លឹបរបស់លោកព្រោះមិនចង់ឲ្យទម្រង់លេងធ្លាក់ចុះ៕
