ខេត្តកំពង់ស្ពឺ៖ ជនសង្ស័យម្នាក់ត្រូវបានដោះលែងវិញហើយកាលពីថ្ងៃទី២៧ ខែធ្នូ កន្លងមកនេះ ក្រោយពេលឃាត់ខ្លួននៅយប់កើតហេតុពាក់ព័ន្ធនឹងករណីបាញ់សម្លាប់ភិក្ខុសង្ឃមួយអង្គ ជាគ្រូសូត្រស្តាំនៅវត្តភ្នៀត ខណៈកំពុងគង់ទេសនានៅក្នុងរោងបុណ្យមួយក្នុងភូមិ។
សមត្ថកិច្ចឲ្យដឹងថា ជនសង្ស័យម្នាក់ឈ្មោះ ជា សារ៉ុម មានទីលំនៅក្នុងភូមិតាំងរងៀង ឃុំមហាសាំង ស្រុកភ្នំស្រួច ខេត្ត កំពង់ស្ពឺ ដែលគេដឹងថា ធ្លាប់បួសជាសង្ឃគង់នៅវត្តភ្នៀតកាលពីឆ្នាំ២០១០ នឹងទើបតែសឹកទៅជាគ្រហស្ថវិញ នៅថ្ងៃទី២៧ ខែធ្នូ ឆ្នាំ២០១៤ ។
បើតាមប្រពភព័ត៌មានពីប្រចាំនៅខេត្តកំពង់ស្ពឺ បានរាយការណ៍នៅព្រឹកថ្ងៃទី២៧ ឆ្នាំ២០១៤នេះ ជន សង្ស័យឈ្មោះ ជា សារ៉ុម ត្រូវសមត្ថកិច្ចដោះលែងវិញហើយ ដោយសារមានបងប្អូនមកធានា នៅចំពោះមុខសមត្ថកិច្ច។
ប្រភពព័ត៌មានពីសមត្ថកិច្ចបានឱ្យដឹងថា ជនសង្ស័យកាលនៅជាភិក្ខុសង្ឃធ្លាប់បានឈ្លោះគ្នាជាមួយភក្ខុសង្ឃរងគ្រោះដោយសារតែសង្ឃរងគ្រោះមានប្រជាប្រិយភាពក្នុងការសម្តែងធម្មទេសនាជាង ហើយនៅក្នុងថ្ងៃកើតហេតុបុរសសង្ស័យក៏បានទៅចូលក្នុងពិធីបុណ្យមួយនៅក្បែររោងបុណ្យកន្លែង កើតហេតុដែរ។ ចាប់តាំងពីថ្ងៃឃាត់ខ្លួនរហូតមកដល់ពេលនេះជនសង្ស័យមិនទាន់ឆ្លើយ សារភាពនៅឡើយទេ។
សូមបញ្ជាក់ថា ភិក្ខុសង្ឃមួយអង្គត្រូវជនមិនស្គាល់មុខលបបាញ់ប្រហារពីក្រោយ ចំព្រះកេសធ្លាយមកដល់មាត់បណ្តាលឱ្យអនិច្ចធម្មនៅនឹងកន្លែងកើតហេតុ ខណៈកំពុង គង់ទេសនានៅក្នុងរោងបុណ្យក្នុងភូមិមួយកន្លែង។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៨និង ៣០នាទីយប់ ថ្ងៃទី២៤ ខែមករា ឆ្នាំ២០១៥ នៅចំណុចភូមិថ្មី ឃុំតាំងក្រូច ស្រុកសំរោងទង ខេត្តកំពង់ស្ពឺ។
ភិក្ខុសង្ឃដែលជនមិនស្គាល់មុខលបបាញ់ប្រហារបណ្តាលឱ្យ អនិច្ចធម្មមាន ព្រះនាម ម៉ឹង អ៊ុំ ព្រះជន្ម៧៦ឆ្នាំ ជាគ្រូសូត្រស្តាំ គង់នៅក្នុងវត្តភ្នៀត ក្នុងភូមិ-ឃុំ កើតហេតុ ហើយព្រះអង្គមានស្រុកកំណើត នៅក្នុងភូមិថ្មី សង្កាត់កណ្តោលដុំ ក្រុងច្បារមន ខេត្តកំពង់ស្ពឺ។
ក្រោយពេលកើតហេតុសមត្ថកិច្ចបានចុះទៅពិនិត្យនៅទីតាំងកើតហេតុ ដោយរកមិនឃើញសម្បកគ្រាប់កន្ទុះនោះទេ។ សមត្ថកិច្ចមិនទាន់ធ្វើការសន្និដ្ឋានថាអំពើបាញ់ប្រហារនេះជាករណី អ្វីនៅឡើយទេ តែមជ្ឍដ្ឋានមហាជនដាក់ការសង្ស័យថាជារឿងគំនុំ៕
