អាមេរិក៖មន្ត្រីការពារជាតិអាមេរិកម្នាក់បានឲ្យដឹងថា មន្ទីរបញ្ចកោណបានដាក់ពង្រាយរ៉ាដាបច្ចេកវិទ្យាខ្ពស់ដើម្បីឃ្លាំមើលការបាញ់បង្ហោះមីស៊ីលរយៈចម្ងាយឆ្ងាយដ៏មានសក្តានុពលរបស់កូរ៉េខាងជើងដែលខ្លួនបានគំរាមក្នុងរយៈពេលប៉ុន្មានខែថ្មីៗនេះ។
វាគឺជាការឆ្លើយតបផ្នែកយោធារបស់អាមេរិកជាលើកដំបូងចំពោះការអះអាងរបស់ទីក្រុងព្យុងយ៉ាងដែលថា ខ្លួនអាចបាញ់មីស៊ីលឆ្លងទ្វីបមួយគ្រាប់នៅពេលណាមួយ។រ៉ាដា X-band មានមូលដ្ឋាននៅសមុទ្រ (SB-X) គឺអាចតាមដានការបាញ់រយៈចម្ងាយឆ្ងាយនិងផ្តល់ជូននូវទិន្នន័យដ៏សំខាន់។
មន្ត្រីបាននិយាយថា រ៉ាដានេះដែលស្ថិតនៅកំពង់ផែកោះហាវ៉ៃគឺត្រូវបានដាក់ពង្រាយជាច្រើនដងមកហើយក្នុងពេលកន្លងមកដើម្បីតាមដានសកម្មភាពរបស់មីស៊ីលកូរ៉េខាងជើង។
ជាទូទៅ SB-X ត្រូវបានបញ្ជូនទៅភាគខាងជើងនៃកោះហាវ៉ៃនិងឈរជើងនៅពាក់កណ្តាលផ្លូវទៅអាឡាស្កាសម្រាប់ជាកន្លែងល្អបំផុតដើម្បីតាមដានការបាញ់បង្ហោះមីស៊ីលមួយដ៏មានសក្តានុពលរបស់កូរ៉េខាងជើងដែលឆ្ពោះទៅអាឡាស្កា ហ្គាមឬឆ្នេរភាគខាងលិចរបស់អាមេរិក។
ការត្រួតពិនិត្យបន្ថែមទៀតកំពុងត្រូវបានកំណត់ដើម្បីតាមដានសកម្មភាពនៅលើឧបទ្វីបកូរ៉េ ប៉ុន្តែមន្ត្រីបានបដិសេធពិភាក្សាអំពីសេចក្តីលម្អិតណាមួយផ្សេងទៀត។
មន្ត្រីការពារជាតិបានគូសបញ្ជាក់ថា ប្រសិនបើកូរ៉េខាងជើងបាញ់មីស៊ីលអន្តរទ្វីបមែននោះ វាអាចនឹងមិនត្រូវបានបាញ់ទម្លាក់ដោយប្រព័ន្ធការពារមីស៊ីលរបស់អាមេរិកឡើយ។
រ៉ាដា SB-X នឹងបង្កើនសមត្ថភាពរបស់អាមេរិកក្នុងការប្រមូលទិន្នន័យមីស៊ីលប្រភេទនោះ។
មេដឹកនាំកូរ៉េខាងជើងលោកគីមជុងអ៊ុននាពេលថ្មីៗនេះបានឲ្យដឹងថា ការធ្វើតេស្តនៃមីស៊ីលអន្តរទ្វីបគឺកំពុងស្ថិតនៅក្នុងដំណាក់កាលចុងក្រោយរបស់ខ្លួន។
ទោះបីជាយ៉ាងណាក៏ដោយ មន្ត្រីអាមេរិកបាននិយាយថា ពួកគេមិនជឿទេថា កូរ៉េខាងជើងមានជំនាញបច្ចេកវិទ្យាសម្រាប់អភិវឌ្ឍន៍មីស៊ីលប្រភេទនេះ៕
