ភ្នំពេញ៖កាលពីវេលាម៉ោង៩ និង៣០ព្រឹកថ្ងៃទី១៧ខែមករាឆ្នាំ២០១៧ ដោយទទួលបានពាក្យបណ្តឹងពីប្រជាពលរដ្ឋ លោក សុទ្ធ ស៊ាធ ចៅសង្កាត់ចោមចៅ បញ្ជាអោយមន្ត្រីសង្កាត់ចោមចៅចុះទៅមើលផ្ទាល់ដោយមានលូស្ទះបង្ហូរទឹកជះក្លិនស្អុយ គ្មាននរណាអើពើដោះស្រាយនោះទេ។
លើសពីនោះទៀតក៏ប្រជាពលរដ្ឋក៏រងផលប៉ះពាល់ពីរោងចក្រនៅក្បែរនោះដែលបានបញ្ចេញខ្យល់ពីរោងចក្រចេញមកខាងក្រៅដោយលាយឡំនិងកម្ចេចក្រណាក់ល្អិតៗ ដែលធ្វើអោយប្រជាពលរដ្ឋនៅក្បែរនោះពិបាកក្នុងការរស់នៅ ទីតាំងខាងលើនេះស្ថិតនៅភូមិជម្ពូវ័ន្ត២ សង្កាត់ចោមចៅ៣ ខណ្ឌពោធិ៍សែនជ័យ ។
ប្រជាពលរដ្ឋម្នាក់ឈ្មោះ ឈឹម យឿន អាយុ២៩ឆ្នាំ ផ្ទះលេខ០៤ ស្នាក់នៅជិតតំបន់នោះតំណាងអោយគ្រួសារជាច្រើនបានរៀបរាប់អោយដឹងថា ជុំវិញបញ្ហានេះលោកបានស្នើសុំឲ្យអាជ្ញាធរចុះធ្វើការពិនិត្យនេះ ដោយសារតែពួកគាត់ពិបាកក្នុងការធ្វើដំណើរទៅមក និងរស់នៅហើយមានកំទេចក្រណាត់ហុយចេញពីក្រុមហ៊ុន ជូឌឺម៉ោ ហ្គាមិនអ៊ីនដ្រាស្រៀល អិលធីឌី ចូលពេញផ្ទះធ្វើអោយពួកគាត់ពិបាកក្នុងការរស់នៅ។
ក្រោយពីទទួលបានពាក្យបណ្តឹងមន្ត្រីអាជ្ញាធរចោមចៅបានចុះទៅត្រួតពិនិត្យផ្ទាល់ជាក់ស្តែងពិតជាមានការកក់ស្ទះប្រព័ន្ធលូដែលប្រជាពលរដ្ឋមិនបានចូលរួមជួយថែរក្សាទើបបង្កអោយមានការកក់ស្ទះដូច្នោះ ចំណែកក្រុមហ៊ុនដែលបង្កផលប៉ះពាល់ពីកំទេចធូលីចេញពីរោងចក្រនោះ នឹងធ្វើការណែនាំក្រុមហ៊ុនអោយជួយកែសម្រួលឡើងវិញ៕ បញ្ញា
