រាជធានីភ្នំពេញ៖នគរបាលប៉ុស្តិ៍រដ្ឋបាលច្បារអំពៅ២ទៅចាប់ខ្លួនបុរសចំណាស់ម្នាក់ដល់ផ្ទះបន្ទាប់ពីបែកធ្លាយករណីចាប់រំលោភសេពសន្ថវៈក្មេងស្រីអាយុ៨ឆ្នាំម្នាក់បានសម្រេចរហូត៣ដង ដែលការឃាត់ខ្លួននេះធ្វើឡើងកាលពីវេលាម៉ោងប្រហែល៨ព្រឹក ថ្ងៃទី២៤ ខែមករា ឆ្នាំ២០១៧ ស្ថិតក្នុងភូមិដើមស្លែង១ សង្កាត់ច្បារអំពៅ២ ខណ្ឌច្បារអំពៅ។
សមត្ថកិច្ចបានដឹងថា ជនសង្ស័យឈ្មោះ ស្រ៊ុន ចាន់ថា ភេទប្រុស អាយុ៥០ឆ្នាំ មុខរបររត់ម៉ូតូឌុប មានស្រុកកំណើតនៅស្រុកស្ទឹងត្រង់ ខេត្តកំពង់ចាម បច្ចុប្បន្នស្នាក់នៅម្តុំទួលតឹង កន្លែងផ្នូរខ្មោចភូមិសង្កាត់ខាងលើ។ ចំណែកក្មេងស្រីរងគ្រោះឈ្មោះ ថ.ស.ព អាយុ៨ឆ្នាំ ស្នាក់នៅជាមួយម្តាយដែលមានសតិមិនប្រក្រតី និងជីដូនចំណាស់ដែលគ្មានលទ្ធភាពធ្វើអ្វីបានដោយរូបនាងកំព្រាឪពុកតាំងពីអាយុ២ខួបកម្ល៉េះ ។
ក្មេងស្រីរងគ្រោះបានឲ្យសមត្ថកិច្ចដឹងថា បុរសចំណាស់ខាងលើបានលួងលោមនាងឲ្យទៅផ្ទះរបស់គេ រួចចាប់រំលោភដោយបង្ខំរហូតបានសម្រេចចំនួន៣ដងផ្ទួនៗគ្នា ។ ក្មេងស្រីដដែលបន្ត ក្រោយមកមានអង្គការមនុស្សធម៌មួយបានចុះទៅភូមិខាងលើ ក្មេងស្រីរងគ្រោះក៏បានរៀបរាប់ប្រាប់ពីអំពើដែលជនសង្ស័យប្រព្រឹត្តមកលើខ្លួន ទើបខាងតំណាងអង្គការបានទូរស័ព្ទទៅកាន់សមត្ថកិច្ចឲ្យជួយអន្តរាគមន៍ឃាត់ខ្លួនតែម្តង។
នៅចំពោះមុខសមត្ថកិច្ច ជនសង្ស័យបានឆ្លើយបដិសេធជាដាច់ខាតថា ខ្លួនមិនបានប្រព្រឹត្តអំពើអ្វីទាំងអស់ទៅលើក្មេងស្រីរងគ្រោះ គ្រាន់ត្រឹមជាអ្នកជិតខាងគ្នាប៉ុណ្ណោះ តែទោះបីជាយ៉ាងណាជនសង្ស័យត្រូវបានឃាត់ខ្លួនបណ្តោះអាសន្ននៅប៉ុស្តិ៍រដ្ឋបាលនគរបាលច្បារអំពៅ២រង់ចាំបន្តនីតិវិធីនៅពេលក្រោយ៕
