ភ្នំពេញ៖ ជាថ្មីម្តងទៀត ឪពុកម្តាយឧកញ៉ា ថោង សារ៉ាត់ ដែលជាប់ចោទពីបទកាន់កាប់អាវុធខុសច្បាប់បានប្តឹងសាទុក្ខទៅ តុលាការកំពូលបន្តទៀត ប្តឹងសុំនៅក្រៅឃុំបណ្តោះអាសន្ន បន្ទាប់ពីសភាស៊ើបសួរសាលាឧទ្ធរណ៍បានបដិសេធម្តងរួចមកហើយ កាលពីពាក់កណ្តាលខែមករាកន្លងទៅនេះ។
នៅថ្ងៃទី០៤ ខែកុម្ភៈ ឆ្នាំ២០១៥ មិនទាន់មានប្រភពពីមន្ត្រីតុលាការកំពូលណាម្នាក់អាចបញ្ជា ក់ បានថា តុលាការកំពូលនឹងបើកសវនាការជំនុំជម្រះនៅថ្ងៃណាអោយពិតប្រាកដនៅឡើយ ទេ។
គួររំលឹកថា បន្ទាប់ពីសាលាឧទ្ធរណ៍បានបដិសេធបណ្តឹងសុំនៅក្រៅឃុំបណ្តោះអាសន្ន របស់ឪពុកម្តាយឧកញ៉ា ថោង សារ៉ាត់ កាលពីព្រឹកថ្ងៃទី២០ ខែមករា ឆ្នាំ២០១៥ កន្លងទៅនេះ នៅព្រឹកថ្ងៃទី២១ ខែមករា តុលាការរាជធានីភ្នំពេញ ដែលមានលោក អាំង មារតីជាប្រធាន បានដឹកនាំគណៈកម្មារធិការចម្រុះ និង កម្លាំងសមត្ថកិច្ចនៃស្នងការដ្ឋាននគរបាលរាជធានីភ្នំពេញ បានចុះទៅឆែកឆេរទីតាំងចំនួនបុរី៩៩៩ ចំនួន២កន្លែង ដែលទីតាំងទី១នៅភូមិត្នោតជ្រុំ សង្កាត់ បឹងទំពុន ខណ្ឌមានជ័យ ប៉ុន្តែសម្រាប់ទីតាំងមួយនេះ។
នាឪកាសនោះ សមត្ថកិច្ចមិនបានរកឃើញអ្វីនោះទេ ទើបបន្តទៅឆែកឆេរភូមិគ្រឹះរបស់ឪពុកម្តាយឧកញ៉ា ថោង សារ៉ាត់ ដែលមានទីតាំងស្ថិតនៅតាមបណ្តោយផ្លូវជាតិ លេខ២ សង្កាត់ចាក់អង្រែក្រោម ខណ្ឌមានជ័យ ដោយរកឃើញមានអាវុធចំនួន ៤ដើម ក្នុងនោះ ( អាវុធខ្លីម៉ាកប៉េអាតា ១ដើម និងកាំភ្លើង AK ចំនួន៣ដើម រួមទាំងគ្រាប់កាំភ្លើងជាច្រើនគ្រាប់ បន្ថែមទៀត ដើម្បីជាវត្ថុតាងដាក់បន្ទុក។
គួររំលឹកថា ឪពុកម្តាយរបស់ឧកញ៉ា ថោង សារ៉ាត់ គឺលោក ថោង ចំរើន អាយុ៦៥ឆ្នាំ និង អ្នកស្រី កែវ សាវី អាយុ៥៥ឆ្នាំ ត្រូវបានតុលាការឃុំខ្លួនដាក់ពន្ធនាគារ កាលពីថ្ងៃទី០៧ ខែធ្នូ ឆ្នាំ២០១៤ ក្រោមការចោទប្រកាន់ពីបទកាន់កាប់អាវុធខុសច្បាប់៕
