ដោយ៖វិធិន
ក្រចេះ៖ទីតាំងសង្វៀនជល់មាន់ចំនួន២កន្លែងផ្សេងគ្នា ត្រូវបានសមត្ថកិច្ចធ្វើការបង្ក្រាប និងរឹបអូសបានសំភារៈវត្ថុតាំងជាច្រើន ព្រមទាំងចាប់ឃាត់មនុស្សចំនួន៤នាក់ ។
ប្រតិបត្តិការខាងលើនេះ គឺកម្លាំងនគរបាលព្រហ្មប្រទណ្ឌកម្រិតស្រាលខេត្តសហការជាមួយកម្លាំងអន្តរគមន៍នៃស្នងការដ្ឋាននគរបាលខេត្តក្រចេះ ក្រោមការសម្របសម្រួលដឹកនាំពីសំណាក់លោក ទី សុវណ្ណថាល់ ព្រះរាជអាជ្ញាអមសាលាដំបូងខេត្ត និងលោក ធុច បច្ចៈសន្តិភាព ព្រះរាជអាជ្ញារងអមសាលាដំបូងខេត្តគឺបានឆ្មក់ទៅបង្ក្រាបទីតាំងចំនួនពីផ្សេងគ្នា កាលពីថ្ងៃទី៦ ខែកុម្ភះ ឆ្នាំ ២០១៧នេះ គឺនៅក្នុងភូមិសំបុក ឃុំសំបុក ស្រុកចិត្របុរី និងមួយកន្លែងទៀតនៅចំណុចត្បូងខ្លារ ស្ថិតក្នុងភូមិអូរកណ្តៀរថ្មី ឃុំអូរគ្រៀង ស្រុកសំបូរ ខេត្តក្រចេះ។
សមត្ថកិច្ចបានបញ្ជាក់ថា បន្ទាប់ស្រាវជ្រាវដឹងថានៅចំណុចទាំងពីខាងលើមាន លួចបើកសង្វៀនជល់មាន់ និងលេងបាញ់អាប៉ោង គឺកម្លាំងសមត្ថកិច្ចបានឆ្មក់ទៅធ្វើការបង្ក្រាប ដោយមិនអោយអាជ្ញាធរ ឬសមត្ថកិច្ចក្នុងមូលដ្ឋានដឹងឡើយ រហូតឈានទៅដល់ការចាប់ឃាត់ខ្លួនមេអាប៉ោង និងអ្នកញៀនល្បែងចំនួនបួននាក់ និងរឹបអូសបានសំភារៈរួមមានរថយន្តមួយគ្រឿង ម៉ូតូ១៦គ្រឿង និងសំភារៈសម្រាប់មាន់ជល់មួយចំនួនផងដែរ ។
ប្រភពពីប្រជាពលរដ្ឋនៅឃុំអូរគ្រៀងបានបញ្ជាក់អោយដឹងថា នៅចំណុចត្បូងខ្លារ ភូមិអូរកណ្តៀរថ្មី គឺមានលួចបើកសង្វៀនជល់មាន់ និងលេងបាញ់អាប៉ោងយូរមកហើយនោះ គឺមានអ្នកចូលទៅលេងច្រើនណាស់ប៉ុន្តែគ្មានសមត្ថកិច្ចណាហ៊ានបង្ក្រាបនោះទេ ។ ប្រភពបន្តរ ការដែលសមត្ថកិច្ចមូលដ្ឋានមិនហ៊ានបង្ក្រាប គេមិនដឹងថាពួកគាត់ទំនាក់ទំនងត្រូវរ៉ូវគ្នា ដោយសារម្ចាស់សង្វៀនជាសមត្ថកិច្ចដូចគ្នាឬក៍ពួកគាត់មានទំនាក់ទំនងអីផ្សេងក៍មិនដឹង ។ ពលរដ្ឋខាងលើក៍បានអោយដឹងថា ម្ចាស់សង្វៀនខាងលើមានឈ្មោះសេង សោភា គឺជាមន្ត្រីយោធារ និងមានតួរនាទីជានាយរងមណ្ឌលទីមួយ ដឺបេ ជើងគោក ដែលបានទៅឈរជើងប្រចាំនៅតំបន់នោះ ដោយឡែកទីតាំងនៅក្នុងឃុំសំបុកសមត្ថកិច្ចនៅមិនទាន់ដឹងថា ម្ចាស់សង្វៀនជានរណាទេ ។
លោក គុណ សុភ័ណ្ឌ នាយការិយាល័យព្រហ្មប្រទណ្ឌកម្រិតស្រាលននស្នងការដ្ឋាននគរបាលខេត្ត បានអោយដឹងថា ជាមួយនិងប្រតិបត្តិចំនួន០២ទីតាំងខាងលើ គឺសមត្ថកិច្ចបានឆ្មក់ទៅបង្ក្រាប និងរឹបអូសបានម៉ូតូចំនួន ១៦គ្រឿង រថយន្ត០១គ្រឿង និងសំភារះសម្រាប់លេងអាប៉ោងមួយចំនួន ឃាត់ខ្លួនមនុស្សបាន៤នាក់ ក្នុងនេះមានមេអាប៉ោងម្នាក់ ហើយសមត្ថកិច្ចក៏បានធ្វើការរុះរើបំផ្លាញចោលនូវទីតាំងសង្វៀននោះ ផងដែរ ។
លោកនាយការិយាល័យ បានបញ្ជាក់បន្ថែមថា បច្ចុប្បន្ន ទាំងម៉ូតូ រថយន្ត និងអ្នកញៀនល្បែងទាំង៤នាក់ គឺត្រូវបានកម្លាំងសមត្ថកិច្ចឃុំខ្លួនបណ្តោះអាសន្ននៅការិយាល័យនគរបាលព្រហ្មទ័ណ្ឌកម្រិតស្រាល ដើម្បីធ្វើការសាកសួរ និងកសាងសំណុំរឿងចាត់ការតាមនីតិវិធី៕
