ខេត្តកំពង់ស្ពឺ៖យោងតាមសេចក្តីរាយការណ៍បានឲ្យដឹងថា នាព្រឹកព្រលឹមថ្ងៃទី១០ ខែកុម្ភ: ឆ្នាំ២០១៧នេះសមត្ថកិច្ចបានឃាត់ខ្លួនជនសង្ស័យ៤នាក់ពាក់ព័ន្ធករណីបាញ់ប្រហារ អ្នកបើកគោយន្តបណ្តាលឲ្យស្លាប់ និងរបួស២នាក់ នៅក្នុងក្រុមហ៊ុន HLH.1 កាលពីយប់មិញ នៅស្រុកឱរ៉ាល់ ខេត្តកំពង់ស្ពឺ។
សេចក្តីរាយការណ៍ដដែលបន្តថា ជនសង្ស័យទាំង៤នាក់ ត្រូវបានឃាត់ខ្លួន ក្នុងនោះមានស្រីម្នាក់ផងដែរ ដែលមានតួនាទីជាប្រធាន អនុប្រធាន និងសន្តិសុខក្រុមហ៊ុន HLH.1 ប៉ុន្តែពួកគេស្ថិតក្រោមការសួរនាំនៅឡើយ។
ទោះយ៉ាងណាក៏ដោយ សមត្ថកិច្ចមិនទាន់អាចបញ្ជាក់ពីមូលហេតុ ដែលនាំឲ្យមានការបាញ់ប្រហារនេះ កើតឡើងទេ តែប្រភពខ្លះនិយាយថា ក្រុមជនសង្ស័យទារលុយមិនបានពីអ្នកបើកគោយន្ត
គួរបញ្ជាក់ថា កាលពីយប់ថ្ងៃទី៩ ខែកុម្ភ: ឆ្នាំ២០១៧ ខ្មាន់កាំភ្លើងមួយក្រុម បើករថយន្តកាម៉ារីគូទស្វិត ពាក់ស្លាកលេខ ខ.ម មកបាញ់ប្រហារអ្នកបើកគោយន្តបណ្តាលឲ្យម្នាក់បានស្លាប់ភ្លាមៗ នៅនឹងកន្លែងកើតហេតុ ខណ:ម្នាក់ទៀតរងរបួស ស្ថិតនៅក្នុងបរិវេណក្រុមហ៊ុន HLH.1 ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ៕
