ខេត្តប៉ៃលិន៖សមត្ថកិច្ច១ក្រុម ដែលបានចុះល្បាតតាមព្រំដែន កាលពីម្សិលមិញបានប្រទះឃើញឈើប្រណីតជាច្រើនកំណាត់ ដែលគេលាក់ទុកនៅក្នុងព្រៃក្បែរបន្ទាយយោធាមួយកន្លែង ស្ថិតនៅចំណុចចន្លោះបង្គោលសីម៉ាលេខ៦៦ និង៦៧ ក្នុងភូមិបតាំងស៊ូ សង្កាត់បយ៉ាខា ក្រុងប៉ៃលិន ដែលគេសង្ស័យថា ជាឈើដែលក្រុមឈ្មួញបានឃុបឃិតគ្នាជាមួយមន្ត្រីសមត្ថកិច្ចព្រំដែនរកស៊ីមុខរបរមួយនេះ។
សមត្ថកិច្ចបញ្ជាក់ថា ក្រោយមកឈើទាំងអស់នោះ នោះត្រូវបានគេយកចូលទៅក្នុងបន្ទាយយោធាខាងលើ ហើយសង្ស័យថា មានការពាក់ព័ន្ធទៅនឹងមន្ត្រីយោធាមួយចំនួនផងដែរ។
ពាក់ព័ន្ធនឹងបញ្ហានេះ លោក អោម វីរៈ នាយខណ្ឌរដ្ឋបាលព្រៃឈើប៉ៃលិន បានឱ្យដឹងថា ខាងលោកបានបញ្ជូនមន្ត្រីរបស់ខ្លួនឱ្យទៅទំនាក់ទំនង ជាមួយមន្ត្រីយោធាកងការពារទី២ វរៈព្រំដែនលេខ៥០៤ ដើម្បីយកឈើទាំងនោះមករក្សាទុកនៅខណ្ឌរដ្ឋបាលព្រៃឈើប៉ៃលិន ហើយលោកក៏បានរាយការណ៍ ពាក់ព័ន្ធនឹងបញ្ហាឈើនេះទៅអភិបាលខេត្តរួចរាល់អស់ហើយ៕
