ខេត្តត្បូងឃ្មុំ៖បុរសជាកម្មករចៀរជ័រម្នាក់បានចាក់សាំងដុតខ្លួន បណ្តាលឲ្យឆេះខ្លោចដូចធ្យូងស្លាប់យ៉ាងអាណោចអាធ័ម ដែលហេតុការណ៍នេះកើតឡើងកាលពីវេលាម៉ោង០៥ និង៣០នាទីព្រឹកថ្ងៃទី១៦ ខែកុម្ភៈ ឆ្នាំ២០១៧ ស្ថិតនៅភូមិ៨៧ ឃុំថ្មពេជ្រ ស្រុក-ខេត្តត្បូងឃ្មុំ។
តាមសមត្ថកិច្ចបានឲ្យដឹងថា ជនរងគ្រោះ ដែលចាក់សាំងដុតសម្លាប់ខ្លួនមានឈ្មោះ ជួន ម៉ុន អាយុ៣៨ឆ្នាំ មានប្រពន្ធឈ្មោះ ផៃ គឹមស៊ា អាយុ៣៨ឆ្នាំ មុខរបរកម្មករចៀរជ័រ រស់នៅភូមិកើតហេតុខាងលើ។ ដោយឡែកបើតាមការរៀបរាប់ពីក្រុមគ្រួសារបុរសរងគ្រោះបានឲ្យដឹងថា ជនរងគ្រោះមានជំងឺសរសៃប្រសាទធ្លាប់រត់ចូលរថយន្តសម្លាប់ខ្លួនម្តងតែមិនបានសម្រេច ហើយនៅថ្ងៃកើតហេតុជនរងគ្រោះបានយកសាំងនៅក្នុងផ្ទះចាក់ដុតសម្លាប់ខ្លួនតែម្តង។
ក្រោយកើតហេតុនគរបាលជំនាញបានចុះទៅត្រួតពិនិត្យសាកសពជនរងគ្រោះរួចប្រគល់ឲ្យ ក្រុមគ្រួសាររងគ្រោះយកទៅធ្វើបុណ្បតាមប្រពៃណី៕
