ម៉ាឡេស៊ី៖ស្ថានទូតកូរ៉េខាងជើងប្រចាំប្រទេសម៉ាឡេស៊ី បាននិយាយថា ជនសង្ស័យ៣នាក់ដែលត្រូវបានសមត្ថកិច្ចម៉ាឡេស៊ីចាប់ខ្លួនពាក់ព័ន្ធនឹងឃាតកម្មលើលោក គីម ជុងណាម នោះត្រូវដោះលែងជាបន្ទាន់។ នេះដោយយោងតាមការចុះផ្សាយរបស់ទីភ្នាក់ងារព័ត៌មា Reuters។
ស្ថានទូតកូរ៉េខាងជើង បាននិយាយនៅក្នុងសេចក្ដីថ្លែងការណ៍មួយថា ស្ត្រីកាន់លិខិតឆ្លងដែនវៀតណាមម្នាក់ ស្ត្រីជនជាតិឥណ្ឌូនេស៊ីម្នាក់ និងបុរសជនជាតិកូរ៉េខាងជើងម្នាក់ ត្រូវបានសមត្ថកិច្ចម៉ាឡេស៊ីចាប់ខ្លួនដោយគ្មានហេតុផល។
រហូតមកទល់នឹងពេលនេះ រឿងក្តីលោក គីម ជុងណាំ នៅតែបន្តការប្រទាញប្រទង់ ខណៈសមត្ថកិច្ចម៉ាឡេស៊ីទើបកំណត់បានជនសង្ស័យពីររូបទៀតដែលសុទ្ធតែជាជនជាតិកូរ៉េខាងជើង ក្នុងនោះរួមមានទាំងមន្ត្រីទូតកូរ៉េខាងជើងម្នាក់ផងដែរ។ ប៉ុន្តែរឿងប៉ូលិសស្នើសុំសួរចម្លើយមន្ត្រីទូតកូរ៉េខាងជើងដ៏គួរឲ្យសង្ស័យរូបនោះ នៅមិនទាន់ទទួលបានការអនុញ្ញាតពីស្ថានទូតកូរ៉េខាងជើងនោះឡើយ។ បន្ថែមពីនេះ អាជ្ញាធរក៏មិនទាន់មានព័ត៌មានស្តីពីសាច់ញាតិលោក គីម ជុងណាំ មកស្នើសុំធ្វើតេស្ត DNA ដើម្បីទទួលយកសាកសពលោកនៅឡើយដែរ។
គួរបញ្ជាក់ថា លោក គីម ជុងណាម ដែលជាបងប្រុសម្ដាយទីទៃជាមួយមេដឹកនាំកូរ៉េខាងជើង លោក គីម ជុងអ៊ុន នោះ ត្រូវបានគេធ្វើឃាតនៅឯព្រលានយន្តហោះអន្តរជាតិទីក្រុងគួឡាឡំពួរ កាលពីសប្ដាហ៍មុន អំឡុងពេលលោកត្រៀមខ្លួនឡើងយន្តហោះហោះហើរទៅកាន់ទីក្រុងម៉ាកាវ៕
