រាជធានីភ្នំពេញ៖នៅសល់តែប៉ុន្មានថ្ងៃទៀតប៉ុណ្ណោះ បក្សសង្គ្រោះជាតិ នឹងធ្វើសមាជវិសាមញ្ញ ដើម្បីជ្រើសរើសប្រធាននិងអនុប្រធានគណបក្ស ខណដែលលោក សម រង្ស៊ី បានប្រកាសលាលែងពីប្រធាន បក្សប្រឆាំងនាពេលថ្មីៗនេះ ។
មន្ត្រីជាន់ខ្ពស់គណបក្សសង្គ្រោះជាតិ បានបង្ហើបព័ត៌មានគួរឲ្យទុកចិត្តបានថា សមាជនាពេលខាងមុខនេះ នឹងត្រូវជ្រើសរើសលោក កឹម សុខា ធ្វើជាប្រធានគណបក្សជំនួសតំណែងលោក សម រង្ស៊ី។ ដោយឡែកតំណែងអនុប្រធានគណបក្សគឺមានតែមួយប៉ុណ្ណោះ ដូចពេលមុនដែលលោក សម រង្ស៊ី ជាប្រធាននិងលោក កឹម សុខា ជាអនុប្រធាន។
ទាក់ទងតំណែងអនុប្រធាននេះ មន្ត្រីជាន់ខ្ពស់បក្សប្រឆាំងរូបនោះអះអាងថា គណៈកម្មាធិការនាយកគណបក្សសង្គ្រោះជាតិ បានឯកភាពហើយ គឺប្រគល់ឲ្យលោក គង់ គាំ បច្ចុប្បន្នជាប្រធានគណបក្ស សម រង្ស៊ី ព្រោះថា មានតែលោក គង់ គាំ តែម្នាក់គត់ដែលស័ក្កសមទទួលតំណែងមួយនេះ។
សូមជម្រាបថា គណបក្សសង្គ្រោះជាតិ គ្រោងរៀបចំសមាជវិសាមញមួយនៅថ្ងៃទី២ ខែមិនាខាងមុខនេះ ដែលសមាជនោះនឹងធ្វើការជ្រើសរើសក្បាលម៉ាស៊ីនដឹកនាំគណបក្សសង្គ្រោះជាតិជាថ្មី បន្ទាប់ពីលោក សម រង្ស៊ី បានលាលែងពីតំណែង៕
