ព្រះសីហនុ៖ ក្រុមហ៊ុន Kazantip បានរៀបចំឯកសារដាក់ជូនទៅរាជរដ្ឋាភិបាលកម្ពុជា ដើម្បីសុំការអនុញ្ញាតប្រគុំតន្ត្រី Kazantipasia លើកោះពស់ ដែលអាជ្ញាធរធ្លាប់បានជំទាស់ព្រោះមានផលប៉ះពាល់ដល់វប្បធម៌ប្រពៃណីខ្មែរ។នេះបើតាមនាយកប្រតិបត្ដិក្រុមហ៊ុនលោក Artem Harchenko បានថ្លែងក្នុងសន្និសីទ កាសែតមួយនៅខេត្តព្រះសីហនុ កាលពីថ្ងៃទី៩ ខែកុម្ភៈ ឆ្នាំ២០១៥។
នាយកក្រុមហ៊ុនបានថ្លែងថា ការប្រគុំតន្ត្រីនេះ មិនមានផលប៉ះពាល់ដល់វប្បធម៌ប្រពៃណីខ្មែរនោះទេ។ពិធីនេះនឹងធ្វើឡើងរយៈពេល១០ថ្ងៃ ចាប់ពីថ្ងៃទី១៨កុម្ភៈ ដល់ថ្ងៃទី២៨ កុម្ភៈ ហើយតម្លៃសំបុត្រសម្រាប់ចូលទស្សនា១សន្លឹក ២០០ដុល្លារសហរដ្ឋអាមេរិក។ កម្មវិធីនេះត្រូវបានគេរំពឹងថា នឹងមានអ្នកមកចូលរួមទស្សនាចំនួនជាង១ពាន់នាក់។
គួរបញ្ជាក់ថា ការព្យាយាមបើកការប្រគំតន្ដ្រីលើដែនកោះពស់នេះ ធ្វើឡើងបន្ទាប់ពីអាជ្ញាធរខេត្តព្រះសីហនុ បានចេញលិខិតសម្រេចផ្អាកនូវសកម្មភាពរៀបចំកម្មវិធីដំណើរកម្សាន្ត របស់ក្រុមហ៊ុន Kazantip Asia Co., Ltd. ជាកម្មវិធីប្រគុំតន្ដ្រីដែលត្រូវបានគេដឹងថាមានលក្ខណៈប្រាសចាកពីប្រពៃណី វប្បធម៌ និងកិត្តិយសប្រទេសកម្ពុជា។
ទោះជាយ៉ាងនេះក្តីការស្នើសុំប្រគុំតន្ត្រី Kazantipasia ថ្មីនេះ នៅមិនទាន់មានលិខិតអនុញ្ញាតពីអាជ្ញាធរខេត្តព្រះសីហនុនៅឡើយទេ។
លោក ឈិត សុខុម អភិបាលខេត្ដព្រះសីហនុកាលពីរសៀលថ្ងៃទី១១ ខែកុម្ភៈ ឆ្នាំ២០១៥ មិនអាចទាក់ទងសុំកាបំភ្លឺបានទេ៕
