សេអ៊ូល៖អាជ្ញាធរកូរ៉េខាងជើងបានសម្រេចចិត្តបន្តហាមឃាត់ប្រជាពលរដ្ឋរបស់ខ្លួនរស់នៅតាមតំបន់ព្រំដែនជាប់ប្រទេសចិនប្រើប្រាស់ទូរសព្ទដៃថែមទៀត បន្ទាប់ពីហាមប្រើ Internet ដើម្បីរារាំងការ ចែករំលែកព័ត៌មានស្ដីពីឃាតកម្មលើបងប្រុសម្ដាយទីទៃលោក គីម ជុងអ៊ុន។ នេះបើយោងតាមសារព័ត៌មាន យ៉ុនហាប់។
នៅក្នុងអំឡុងសន្និសិទសារព័ត៌មាននៅក្នុងទីក្រុងមួយស្ថិតក្បែរព្រំដែនចិន-កូរ៉េខាងជើងកាលពីពេលថ្មីៗនេះ ក្រុមអាជ្ញាធរកូរ៉េខាងជើង បានអំពាវនាវ ក៏ដូចជាដាស់តឿនដល់ប្រជាជនរបស់ខ្លួនប្រុងប្រយ័ត្ន និងត្រៀមចិត្តទុកជាមុន បើសិនជាហ៊ានចែករំលែកសារ ឬរូបភាពតាមរយៈ SMS ជាមួយបណ្ដាជនបរទេស។ ជាងនេះទៅទៀត ពួកគេក៏បានព្រមានដែរថា ការឆ្លងកាត់ព្រំដែនចូលទៅក្នុងទឹកដីចិន ដោយខុសច្បាប់ គឺជាទង្វើក្បត់មិនអាចអត់ឱនឱ្យបានជាដាច់ខាត។
គួរបញ្ជាក់ថា កាលពីប៉ុន្មានថ្ងៃមុនទីក្រុងព្យុងយ៉ាង ក៏បានដាក់បម្រាមមិនឱ្យប្រជាជនរបស់ខ្លួន នៅទូទាំងពិភពលោក ប្រើ Internet ផង ដែរ បើពុំដូច្នោះទេនឹងត្រូវទទួលទោស៕
