រាជធានីភ្នំពេញ៖នារីស្រស់ស្អាតជាកម្មការិនីរងចក្រម្នាក់ត្រូវជនសង្ស័យម្នាក់បានធ្វើសកម្មភាពឆក់កាបូប ហើយជះទឹកអាស៊ីតដាក់ផ្ទៃមុខបណ្តាលឲ្យរងរបួសធ្ងន់ថែមទៀត។ ហេតុការណ៍នេះបានកើតឡើងកាលពីវេលាម៉ោង០៨ និង១០នាទីយប់ថ្ងៃទី១៤ ខែមីនា ឆ្នាំ២០១៧ ស្ថិតនៅខាងត្បូងវិហារចាម ភូមិត្រពាំងពោធិ សង្កាត់ចោមចៅ ខណ្ឌពោធិ៍សែនជ័យ។
នារីរងគ្រោះមានឈ្មោះ ស៊ន ចាន់ទី អាយុ២៣ឆ្នាំ មុខរបរកម្មការិនីរោងចក្រ ស្នាក់នៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។ ប្រភពព័ត៌មានបានឲ្យដឹងថា មុនពេលកើតហេតុគេឃើញជនរងគ្រោះចេញពីធ្វើការ ហើយជិះកង់ទៅរៀនអ៊ុតសក់ដូចសព្វដង លុះជិះកង់ដល់ចំណុចកើតហេតុក៏ស្រាប់តែមានជនសង្ស័យម្នាក់បានរត់មកឆក់កាបូបស្ពាយរបស់នាង ហើយជះទឹកអាស៊ីតលើផ្ទៃមុខនាងថែមទៀត បណ្តាលឲ្យនាងរងរបួសយ៉ាងធ្ងន់ធ្ងរ។ បន្ទាប់ពីឆក់កាបូបបានសម្រេចហើយ ជនសង្ស័យក៏បានរត់គេចខ្លួនបាត់ ចំណែកឯនារីរងគ្រោះត្រូវបានប្រជាពលរដ្ឋរស់នៅក្បែរនោះទូរស័ព្ទហៅរថយន្តសង្គ្រោះបន្ទាន់ ដើម្បីមកដឹកនាងទៅមន្ទីរពេទ្យ។
បច្ចុប្បន្ននារីរងគ្រោះកំពុងតែសម្រាកព្យាបាលនៅមន្ទីរពេទ្យព្រះកុសុមៈ៕
