រាជធានីភ្នំពេញ៖គណបក្សប្រជាជនកម្ពុជា សម្រេចបន្ថែមថវិកាដល់សមាជិករបស់ខ្លួននៅឃុំ-សង្កាត់ សម្រាប់ការចំណាយក្នុងពេលបោះឆ្នោតថ្នាក់ក្រោមជាតិ នៅខែមិថុនាខាងមុខនេះ ដោយសម្រេចផ្តល់ថវិកា បីលានរៀល បន្ថែមទៀតក្នុង ១ឃុំ-សង្កាត់ ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ឲ្យដឹងទៀតថា ពីមុនគណបក្សនេះបានផ្តល់ថវិកាចំនួន ១០លានរៀលម្តងហើយក្នុងមួយឃុំ ឬសង្កាត់ តែដោយសារមានតម្រូវការជាក់ស្តែងគណបក្សក៏ទម្លាក់លុយបន្ថែម៣លានរៀលទៀត។
លោក សុខ ឥសាន បញ្ជាក់ថា បើមួយឃុំឬមួយសង្កាត់ត្រូវចាយលុយចំនួន១៣លានរៀល មានន័យថា សរុបទាំងជាង១៦០០ឃុំនិងសង្កាត់ទូទាំងប្រទេស គណបក្សប្រជាជនកម្ពុជាត្រូវបានចំណាយជាង៥លានដុល្លារក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ឆ្នាំនេះ។
យ៉ាងណាក៏ដោយ មានការរិះគន់ថា ថវិកាទាំងអស់នោះមិនសូវបានធ្លាក់ដល់ដៃមន្ត្រីមូលដ្ឋានទាំងអស់ទេ ប៉ុន្តែក្រុមការងារថ្នាក់ជាតិដែលចុះជួយមូលដ្ឋានជាអ្នកបោះមេក្នុងការចាត់ចែងចាយលុយទាំងអស់នោះ៕
