ក្រចេះ៖លោក ជុច ភឿន រដ្ឋលេខាធិការនៃក្រសួងវប្បធម៌ និងវិចិត្រសីល្បៈមានប្រសាសន៍លើកឡើងថា ប្រធានបទយុវជនដើម្បីវប្បធម៌ជាតិ ត្រូវបានធ្វើឡើងរយៈពេល២ឆ្នាំជាប់គ្នា ដើម្បីជម្រុញឲ្យយុវជនចេះបង្កើតប្រធានបទថ្មីក្នុងការអប់រំមនុស្ស និងទម្រង់សីល្បៈដទៃទៀតក៏មានលក្ខណៈអបរំមនុស្សដែរ ។
លោករដ្ឋលេខាធិការមានប្រសាសន៍លើកឡើងយ៉ាងដូច្នេះ នៅក្នុងឱកាសប្រារព្ធពិធីអបអសាទរទិវាវប្បធម៌ជាតិ ៣ មិនា លើកទី១៩ ឆ្នាំ២០១៧ ដោយមានការអញ្ចើញជាគណអធិបតីពីលោក ជាក់ ម៉េងហ៊ាង អភិបាលរងខេត្តក្រចេះ ដែលរៀបចំឡើងដោយមន្ទីរវប្បធម៌និងវិចិត្រសីល្បះខេត្ត នៅសាលមហោស្រពខេត្តក្រចេះ ព្រមទាំងមានវត្តមានចូលរួមពីគ្រប់មន្ទីរ ស្ថាប័ន អង្គភាព មន្ត្រីរាជការ សង្គមស៊ីវិល និងសិស្សនុសិស្សជាច្រើនរូប ។ លោក ជុច ភឿន រដ្ឋលេខាធិការ មានប្រសាសន៍បន្តថា យុវជន គឺជាធនធានដ៏សំខាន់ក្នុងការបន្តវេន និងថែរក្សានូវវប្បធម៌ដ៏ថូរថង់របស់យើង ។
គូសបញ្ជាក់ដែរថា កន្លងទៅថ្មីៗនេះ មន្ទីរវប្បធម៌ខេត្ត បានសហកាជាមួយមន្ទីរអប់រំយុវជនខេត្ត បានបង្កើតសីល្បះមួយទម្រង់ដើម្បីចូលរួមមហោស្រពសីល្បះយុវជនលើកទី៣ គឺល្ខោនអប់រំរឿង ស្បែកជើងមួយជំហៀង ជាលទ្ធផលទទួលបានជ័យលាភីថ្នាក់កិត្តិយសទូទាំងប្រទេសលើទម្រង់ល្ខោននិយាយ ។
លោកក៏បានបញ្ជាក់បន្ថែមថា នៅឆ្នាំ២០១៧នេះ រាជរដ្ឋាភិបាលបានកំណត់យកប្រធានបទ យុវជនដើម្បីវប្បធម៌ជាតិ ដើម្បីឲ្យយុវជនដ៏ដូចជា ពលរដ្ឋទូទាំងអស់ បង្កើនការស្រឡាញ់ និងមានស្មារតីកាន់តែកាន់តែខ្លាំងក្លា លើកកម្ពស់ការយល់ដឹងអំពីតម្លៃពិតនៃវប្បធម៌ជាតិ បង្កើនការសិក្សាស្រាវជ្រាវ និងចងក្រងឯកសារទុក លើកស្ទួយការប្រើប្រាស់សក្ដានុពលវប្បធម៌ក្នុងន័យដើម្បីបង្កើនការងារ និងការទទួលខុសត្រូវខ្ពស់ក្នុងការផ្សព្វផ្សាយអភិរក្ស និងអភិវឌ្ឍន៍វប្បធម៌ជាតិ ព្រមទាំងវប្បធម៌ចម្រុះប្រកបដោយនិរន្តភាព ។
ទន្ទឹមនោះដែរលោករដ្ឋលេខាធិការ ក៏បានអំពាវនាវដល់មន្ទីរអង្គភាពទាំងអស់ និងអង្គការក្រៅរដ្ឋាភិបាល ត្រូវជម្រុញការចូលរួមប្រកបដោយស្មារតីទំនួលខុសត្រូវខ្ពស់ ក្នុងការអភិរក្សនូវវប្បធម៌ឲ្យបានគង់វង្ស ស្របតាមពាក្យស្លោក “ វប្បធម៌ដើម្បីអប់រំ អប់រំដើម្បីវប្បធម៌ ” ៕
