រាជធានីភ្នំពេញ៖សារព័ត៌មានថៃបានចុះផ្សាយព័ត៌មានផ្សាយថា ពលករខ្មែរខុសច្បាប់រាប់រយនាក់ មានចេតនាចេញមុខជាសាធារណៈឲ្យអាជ្ញាធរថៃចាប់ខ្លួន ដើម្បីឲ្យពួកគេបានមកលេងស្រុកកំណើតវិញក្នុងឱកាសបុណ្យចូលឆ្នាំនៅពេលខាងមុខនេះ ដោយមិនអស់លុយលើការធ្វើដំណើរ។
សារព័ត៌មាន The Nation របស់ថៃចុះផ្សាយថា យ៉ាងតិចពលករខ្មែរខុសច្បាប់ជាង២០០នាក់ បានធ្វើដំណើរជាសាធារណៈតាមរថភ្លើងពីបាងកកមកព្រំដែនកម្ពុជា-ថៃ ច្រកប៉ោយប៉ែត ។ ប៉ុន្តែអ្នកទាំងនោះត្រូវបានរៀបចំធ្វើដូច្នេះ ដើម្បីឲ្យសមត្ថកិច្ចថៃចាប់ខ្លួន ព្រោះថា ពេលអាជ្ញាធរចាប់ខ្លួនពួកគេនឹងបានធ្វើដំណើរដល់ព្រំដែនដោយមិនអស់លុយ ដោយរថយន្តសមត្ថកិច្ចជាអ្នកដឹកជញ្ជូន។
តាមអាជ្ញាធរថៃបញ្ជាក់ថា តាមធម្មតាបើគេជិះរថយន្តឈ្មួលពីព្រំដែនច្រកប៉ោយប៉ែតដល់បាងកកអស់ប្រមាណជាង២០០បាត ឬ ស្មើជិត៣០ ០០០រៀល។ ចំណែកការធ្វើដំណើរតាមរថភ្លើងអាចចំណាយតិចជាងនេះ ។ ទន្ទឹមនោះពលករខ្មែរមួយចំនួនក្នុងចំណោមពលករជាង១លាននាក់ដែលកំពុងបំរើការងារនៅប្រទេសថៃពួកគាត់នឹងធ្វើដំណើរមកស្រុកកំណើតនៅអំឡុងពេលចូលឆ្នាំខាងមុខនេះ៕
