រាជធានីភ្នំពេញ៖រដ្ឋមន្ត្រីក្រសួងទេសចរណ៍លោក ថោង ខុន បានថ្លែងថា ភ្ញៀវទេសចរទាំងជាតិ និងអន្តរជាតិប្រមាណ១,៦លានទៅ១,៧លាននាក់បានទៅលេងកម្សាន្តនៅអង្គរសង្ក្រាន្តខេត្តសៀមរាប ក្នុងរយៈពេល៤ថ្ងៃ ចាប់ពីថ្ងៃទី១៣ដល់១៦ ខែមេសា ឆ្នាំ២០១៧។
លោក ថោង ខុន ថ្លែងបញ្ជាក់ថា ព្រឹត្តិការណ៍អង្គរសង្ក្រាន្តនាឱកាសបុណ្យចូលឆ្នាំថ្មីប្រពៃណីជាតិឆ្នាំ២០១៧នេះ កិច្ចការមានសភាពល្អប្រសើរ ប្រកបដោយសុវត្ថិភាព ពុំមានបញ្ហាអ្វីគួរឲ្យកត់សម្គាល់នោះឡើយ។ ចំណែកភ្ញៀវទេសចរអន្តរជាតិដែលបានទិញសំបុត្រចូលទស្សនាប្រាសាទក្នុងរយៈពេល៣ថ្ងៃ មានចំនួន២០.៧២៨នាក់ កើន២៨%ប្រៀបធៀបនឹងរយៈពេលដូចគ្នាក្នុងឆ្នាំ២០១៦ ដោយមិនទាន់រាប់បញ្ចូលភ្ញៀវទេសចរអន្តរជាតិដែលចូលមកកម្សាន្តក្នុងកម្មវិធីអង្គរសង្ក្រាន្ត ហើយមិនទាន់ទិញសំបុត្រចូលទស្សនាអង្គរនោះទេ៕
