ដោយ៖កូននាគកំណាច
ខេត្តក្រចេះ៖សកម្មភាពបទល្មើសព្រៃឈើ និងកន្លែងស្តុបទុកឈើប្រណិតជាច្រើនកន្លែង នៅចំណុចភូមិរលួស ឃុំរលួសមានជ័យ ក្នុងទឹកដីនៃស្រុកសំបូរ ខេត្តក្រចេះ គ្មានសមត្ថកិច្ចណាម្នាក់ចុះធ្វើការបង្ក្រាបនោះឡើយ ត្រូវបានគេសង្ស័យថា គឺមានការឃុបឃិតគ្នាលក្ខណៈជាប្រព័ន្ធរវាងពួកក្រុមឈ្មួញ និងសមត្ថកិច្ច ជាពិសេសពួកមេព្រៃនៅតំបន់នោះ ។
ប្រភពច្បាស់ការណ៍បានឲ្យដឹងថា បទល្មើសព្រៃឈើដែលសុទ្ធសឹងជាឈើប្រណិតទាំងនោះ គឺឋិតនៅក្នុងដែនសមត្ថកិច្ចគ្រប់គ្រងរបស់លោក ណុប ណារិទ្ធ ដែលមានតួនាជានាយសង្កាត់រដ្ឋបាលព្រៃឈើរលួសមានជ័យ។ ប្រភពដដែលបន្តថា សព្វថ្ងៃនេះ មានរថយន្តកែច្នៃធំៗ និងគោយន្តកន្ត្រៃជាច្រើនគ្រឿង កំពុងធ្វើសកម្មភាពដឹកជញ្ជូនបទល្មើសព្រៃឈើយ៉ាងពេញទំហឹង គ្មានខ្លាចញញើតសមត្ថកិច្ចណាម្នាក់ឡើយ ដោយមានការបើកដៃពីដំណាក់លោក ណុប ណារិទ្ធ នាយសង្កាត់រដ្ឋបាលព្រៃឈើរលួសរូបនោះ ដោយដឹកកាត់មុខស្នាក់ការមេព្រៃរលួសទាំងថ្ងៃ យកទៅស្តុកជាច្រើនកន្លែង ដើម្បីលើកដាក់ឡានធុនធំខ្នាត់យក្ស ដឹកបន្តយកទៅលក់នៅព្រំដែនវៀតណាម ។
ប្រភពពីប្រជាពលរដ្ឋបង្ហើបឲ្យដឹងថា ការដឹកជញ្ជូនឈើរាល់ថ្ងៃនេះ ក្នុងមួយឡានត្រូវបង់លុយឲ្យលោក ណុប ណារិទ្ធ ពី៣០ម៉ឺនទៅ៤០ម៉ឺនរៀល ហើយសូម្បីតែគោយន្តកន្ត្រៃរបស់ប្រជាពលរដ្ឋដឹកឈើអារជន្លងម្រេចបន្តិចបន្តួចដើម្បីចិញ្ចឹមជីវិត ក៏ត្រូវបង់លុយទាំងអស់ដែរ បើមិនបង់លុយគឺចាប់តែម្តង ។
គួរបញ្ជាក់ថា នៅក្នុងឃុំរលួសមានជ័យ ស្រុកសំបូរ កើតមានបទល្មើសពេញយ៉ាងទំហឹង មិនមែនមានតែបទល្មើសព្រៃឈើប៉ុណ្ណោះទេ គឺថែមទាំងមានរោងសិប្បកម្មកែច្នៃឥតច្បាប់ជាច្រើនកន្លែងពេញទឹកពេញដីទៀតផង ។ ប៉ុន្តែលោក ណុប ណារិទ្ធ ហាក់នីជាមិនយកភ្នែកមើលទាល់តែសោះ ឬមួយលោកទទួលបានលាភសក្ការៈពីឈ្មួញទាំងនោះ ទើបបានជាគ្មានចំណាត់ការបង្ក្រាបយ៉ាងដូច្នេះ ?
សូមលោក ប៊ុយ រតនា នាយផ្នែករដ្ឋបាលព្រៃឈើក្រចេះ មេត្តាជួយពិនិត្យមើលសកម្មភាពបទល្មើសព្រៃឈើនៅក្នុងទឹកដីខេត្តក្រចេះផង ឃើញថាមានការកើតឡើងយ៉ាងគក្រឹកគគ្រេង៕
