ដោយ៖ប៉ែន សុផល
បាត់ដំបង៖របួសធ្ងន់និងស្រាលជាង១០នាក់ក្នុងហេតុគ្រោះថ្នាក់ចរាចរណ៍រថយន្តដឹកអ្នកដំណើរក្រុមហ៊ុនរឹទ្ធ មុនីបុកដើមអំពិលបារាំងដោយសារអ្នកបើកបរងងុយដេក។
លោក ប៉ាង ហៀង អធិការដ្ឋាននគរបាលក្រុងបាត់ដំបងបានប្រាប់សារព័ត៌មានមេគង្គប៉ុស្តិ៍អោយដឹងថា រថយន្តដឹកអ្នកដំណើររបស់ក្រុមហ៊ុនរឹទ្ធមុនីដែលបានជួបហេតុគ្រោះថ្នាក់នៅវេលាម៉ោង១០ និង៤០នាទីព្រឹកថ្ងៃទី១០ ខែឧសភា ឆ្នាំ២០១៧ត្រង់ចំណុចក្រុមទី៣ ភូមិបាឡាត់ សង្កាត់អូរម៉ាល់ ក្រុងបាត់ដំបង ខេត្តបាត់ដំបង។ លោកបន្តថា រថយន្តខាងលើនេះបានដឹកអ្នកដំណើរពេញ ដោយចេញពីខេត្តប៉ៃលិនឆ្ពោះទៅកាន់ទីក្រុងភ្នំពេញក្នុងទិសដៅពីលិចទៅកើត។ មកដល់កន្លែងកើតហេតុអ្នកបើកបរងងុយដេកបានរ៉េចង្កូតទៅបុកដើមអំពិលបារាំងពេញទំហឹងតែម្តងនៅម្ខាងនៃគន្លងផ្លូវរបស់ខ្លួន។
សាក្សីនិយាយថា .ក្នុងហេតុគ្រោះថ្នាក់ចរាចរណ៍នេះដែរបណ្តាលអោយអ្នកធ្វើដំណើរប្រុស ស្រីទាំងក្មេង ទាំងចាស់រងរបួសជាង១០នាក់ ក្នុងនោះមានអ្នកបើកបរម្នាក់ផងដែររងរបួសបាក់ជើងឆ្វេងនិងអ្នករួមដំណើរមិនស្គាល់អត្តសញ្ញាណមួយចំនួនធំទៀតខ្លះបាក់ធ្មេញ រលាត់មុខមាត់ ក្រិចដៃជើងជាដើម។ ពេលនេះជនរងគ្រោះដែលអស់ជំនឿចិត្តនិងភាពកក់ក្តៅលើក្រុមហ៊ុនរឹទ្ធមុនីកំពុងដាក់ពាក្យបណ្តឹងទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបាត់ដំបងបន្ទាប់ទទួលការព្យាបាលនៅមន្ទីរពេទ្យ៕
