ត្បូងឃ្មុំ ៖ កាលពីវេលាម៉ោង១១ព្រឹកថ្ងៃទី២៦ ខែកុម្ភៈនេះ មានរថយន្តប្រភេទហ៊ីយ៉ាន់ដាយ២តោនកន្លះ មួយគ្រឿងពណ៌ខៀវ បានក្រឡាប់នៅលើកំណាត់ផ្លូវទ្រីបក្រាលគ្រួសក្រហម ស្ថិតនៅភូមិល្វាធំ ឃុំល្ងៀង ស្រុកត្បូងឃ្មុំ ខេត្តត្បូងឃ្មុំ បណ្តាលឲ្យស្លាប់អ្នកបើកបរម្នាក់ និងរបួស៣នាក់ ត្រូវបានបញ្ជូនទៅសង្គ្រោះនៅមន្ទីរពេទ្យ។
នគរបាលស្រុកត្បូងឃ្មុំ ឲ្យដឹងថា អ្នកដែលស្លាប់ក្នុងហេតុការណ៍នោះឈ្មោះ ផេង ទីណា ភេទប្រុស អាយុ២៧ឆ្នាំ នៅភូមិខ្នារ ឃុំស្រឡប់ ស្រុកត្បូងឃ្មុំ និងអ្នករងរបួស៣នាក់ទៀតដែលរួមដំណើរជាមួយមាន ១-ឈ្មោះ ខន ករុណា ភេទប្រុស អាយុ២០ឆ្នាំ ២-ឈ្មោះសុខ យ៉ខាយ ភេទប្រុស អាយុ២០ឆ្នាំ និង៣-ឈ្មោះ សុខ ទីម៉ាច ភេទប្រុស អាយុ១៣ឆ្នាំ ទាំង៣នាក់នៅភូមិល្ងៀង ឃុំល្ងៀង ស្រុកត្បូងឃ្មុំ។
នគរបាលស្រុកត្បូងឃ្មុំ បានបន្តថា មុនពេលកើតហេតុរថយន្តនេះបានបើកចេញពីលិចមកកើតតាមផ្លូវទ្រីប លុះមកដល់ត្រង់ភូមិខាងល្វាធំ ក៏បានប្រឡាប់ បណ្តាលឲ្យស្លាប់អ្នកបើកបរភ្លាមៗនៅនឹងកន្លែងកើតហេតុ។
នគរបាលជំនាញចរាចរស្រុក បានបញ្ជាក់ថា អ្នកបើកបរ បានផឹកស្រាស្រវឹងហើយឡើងបើករថយន្តចេញពីចាន់ទូង ដើម្បីទៅទិញជ័រកៅស៊ូនៅស្រុកតំបែរ ដោយបើកបរក្នុងល្បឿនលឿន ខណៈពេលដល់ផ្លូកោងយកចង្កូតមិនទាន់ទើបធ្វើឲ្យរថយន្តក្រឡាប់ជិត ១០ត្រឡប់រងការខូចខាតជាដំណំ។ ចំណែកអ្នកជិះជាមួយ៣នាក់ទៀតបានផ្លោងខ្ទាតចេញពីរថយន្ត សំណាងល្អគ្រាន់តែរងរបួសប៉ុណ្ណោះ៕fpm
