កុមារ១១នាក់ស្លាប់ក្នុងករណីរថយន្តដឹកសិស្សក្រឡាប់នៅចិន
ប៉េកាំង៖កុមារយ៉ាងហោចណាស់ចំនួន១១នាក់ដែលក្នុងនោះភាគច្រើនជាកុមារជនជាតិកូរ៉េខាងត្បូង បានស្លាប់ បន្ទាប់ពីរថយន្តដឹកសិស្សក្រឡាប់នៅក្នុងផ្លូវក្រោមដីមួយកន្លែងក្នុងខេត្ត Shandong នៅភាគខាងកើតនៃប្រទេសចិន។
ហេតុការណ៍នេះ ក៏បានបណ្តាលឲ្យគ្រូម្នាក់ដែលធ្វើដំណើរជាមួយសិស្សមានគ្រោះថ្នាក់ធ្ងន់ធ្ងរផងដែរ។ កុមារទាំងនោះមានអាយុចន្លោះពី ៣ ទៅ៧ឆ្នាំ ដែលរថយន្តដឹកទៅសាលមតេយ្យរបស់ពួកគេនៅក្នុងទីក្រុង Weihai។ នេះបើយោងតាមការផ្សាយរបស់បណ្តាគព័ត៌មាន BBC។
មន្ត្រីនិយាយថា ឧបទ្ទវហេតុដែលកើតឡើងនៅថ្ងៃអង្គារនេះ កំពុងស្ថិតនៅក្រោមការស៊ើបអង្កេត។ ក្នុងចំណោមកុមារទាំង១១នាក់នោះ គឺ១០នាក់ជាជនជាតិកូរ៉េខាងត្បូង ហើយក្នុងចំណោម១០នាក់នោះ មាន៥នាក់មានទាំងសញ្ជាតិចិន និងកូរ៉េខាងត្បូង៕
