រាជធានីភ្នំពេញ ៖ គណបក្សសង្គ្រោះជាតិបានសម្រេចជាថ្មីដោយរក្សាទុកតំណែងអនុប្រធានគណបក្ស៣រូបដដែល រួមមាន៖ លោក ប៉ុល ហំម , លោក អេង ឆៃអ៊ាង និងលោកស្រី មួរ សុខហួរ ខណៈដែលអនុប្រធានទាំង៣រូបនេះ ត្រូវបានក្រសួងមហាផ្ទៃមិនទទួលស្គាល់ម្តងរួចទៅហើយ ។
សូមជម្រាបថា នៅថ្ងៃទី១៧ ខែឧសភានេះ គណកម្មាធិការនាយកគណបក្សសង្គ្រោះជាតិ បានបើកកិច្ចប្រជុំមួយ ដើម្បីជ្រើសរើសតំណែងអនុប្រធានគណបក្ស ។ ក្រោយកិច្ចប្រជុំមន្ត្រីអ្នកនាំពាក្យគណបក្សបានបញ្ជាក់ថា តំណែងអនុប្រធានគណបក្សគឺនៅរក្សាទុក៣រូបដដែលពុំមានការផ្លាស់ប្តូរនោះឡើយ ។
លោក យឹម សុវណ្ណ បានបន្ថែមថា ការរៀបចំជ្រើសតាំងអនុប្រធានទាំង៣នាក់ជាថ្មីម្តងទៀតនេះ គឺដើម្បីធ្វើយ៉ាងណាឱ្យស្របទៅតាមលក្ខន្តិកៈថ្មី ដែលទើបទទួលស្គាល់ ដោយក្រសួងមហាផ្ទៃ។ លោកថ្លែងបញ្ជាក់ថា យើងធ្វើនេះ គឺឱ្យស្របទៅតាមលក្ខន្តិកៈ ដែលបានតម្កល់នៅក្រសួងមហាផ្ទៃ ដូច្នេះគណបក្សសង្គ្រោះជាតិ យល់ឃើញថា នឹងមិនមានអ្វីជាឧបសគ្គ ចំពោះការទទួលស្គាល់អនុប្រធានទាំង៣រូបរបស់គណបក្សនោះទេ៕
