រាជធានីភ្នំពេញ ៖ សមត្ថកិច្ចបានចាប់ខ្លួនបុរសជនជាតិចិនម្នាក់ ពាក់ព័ន្ធការជំរិតទារប្រាក់ប្រមាណ១ម៉ឺនដុល្លារ ទៅ២ម៉ឺនដុល្លារ ពីអតីតសង្សារដែលជាអាជីវករផ្សារទួលទំពូង ជាថ្នូរនឹងការមិនទៅអុកឡុកដល់តូបលក់ដូរ ។ ជនសង្ស័យឈ្មោះ ZHU HONG YU អាយុ៣៩ឆ្នាំ មុខរបរជាអ្នកជំនួញស្នាក់នៅផ្ទះជួល ក្នុងខណ្ឌចំការមន រាជធានីភ្នំពេញ។
តាមមន្ត្រីឲ្យដឹងថា ជនជាតិចិនម្នាក់នេះមានសង្សារជាមួយស្ត្រីម្នាក់ដែលជាអាជីវករលក់ដូរនៅផ្សារទួលទំពូង ។ ប៉ុន្តែក្រោយមកពួកគេទាំងពីរនាក់មានភាពរកាំរកុះ ក៏បានបែកបាក់គ្នា ហើយខាងស្រី ក៏ឈប់ទាក់ទងខាងប្រុស តែខាងប្រុសបាន និងព្យាយាមទៅអុកឡុកខាងស្រី នៅតូបលក់ដូរជាញឹកញាប់ ហើយ ពេលជនសង្ស័យទៅអុកឡុក អតីតសង្សារម្តងៗ ជននេះតែងតែគំរាមទារប្រាក់ពី១ម៉ឺនដុល្លារទៅ២ម៉ឺនដុល្លារ ទើបគេឈប់មកអុកឡុក។
សមត្ថកិច្ចឲ្យដឹងថា ប្រហែលជាទ្រាំលែងបាននិងទង្វើរបស់ជនជាតិចិនរូបនោះ ស្ត្រីជាអតីតសង្សារ សម្រេចចិត្តប្តឹងសមត្ថកិច្ចឲ្យចាប់ខ្លួន ដើម្បីចាត់ការតាមផ្លូវច្បាប់។ យ៉ាងណាក៏ដោយភ្នាក់ងារបានរាយការណ៍ថា បន្ទាប់ពីការសួរនាំរួចមក ជនសង្ស័យរូបនេះត្រូវបានតំណាងអយ្យការ ធ្វើការដោះលែងឲ្យត្រឡប់ទៅវិញផងដែរ៕
