ក្រសួងការពារជាតិ​ប្រតិកម្ម​ចំពោះ​សេចក្តីថ្លែងការណ៍​របស់​ខុមហ្វ្រែល​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 26 May, 2017 ក+ ក-

​រាជធានី​ភ្នំពេញ ៖ ក្រសួងការពារជាតិ​បាន​ប្រតិកម្ម​ចំពោះ​សេចក្តីថ្លែងការណ៍​របស់​អង្គការ​ខុមហ្វ្រែល ដែល​បង្គាប់​មកលើ​កង​យោធពលខេមរភូមិន្ទ ខណដែល​មន្ត្រីជាន់ខ្ពស់​ក្រសួងការពារជាតិ ចាត់ទុក​ខ្លឹមសារ​នៃ​សេចក្តីថ្លែងការណ៍​នោះ គឺជា​ការ​លាប​ពណ៌ និង​ប្រមាថ​មាក់ងាយ​ដល់​កិត្តិយស តួនាទី និង​ភារកិច្ច​របស់​កងទ័ព​កម្ពុជា ដែល​ក្រសួងការពារជាតិ មិនអាច​ទទួលយកបាន​ឡើយ ។​
​លោកនាយ​ឧ​ត្ត​ម​សេនីយ៍ ឈុំ សុជាតិ អ្នកនាំពាក្យ​ក្រសួងការពារជាតិ​ថ្លែងថា សេចក្តីថ្លែងការណ៍​រប​ស់ សមាគម និង​អង្គការ​សង្គម​ស៊ីវិល​នៅ​កម្ពុជា​នៃ​បន្ទប់​ស្ថានការណ៍ សម្រាប់​ការបោះឆ្នោត​គឺមាន​ចេតនា​ញុះញង់ និង​លាប​ពណ៌​មកលើ​កងយោធពល​ខេមរភូមិន្ទ និង​ជាការ​ប្រមាថ​មាក់ងាយ​ដល់​កិត្តិយស តួនាទី ភារកិច្ច​របស់​កងយោធពល​ខេមរភូមិន្ទ​។ សេចក្តីថ្លែងការណ៍ ដោយ​បង្គាប់បញ្ជា មកលើ​កងយោធពល​ខេមរភូមិន្ទ គឺជា​ការរំលោភ​ដ៏​ធ្ងន់ធ្ងរ មកលើ​កង​យោពល​ខេមរភូមិន្ទ ដែល​មិនអាច​ទទួលយក​បានឡើយ ។​
​ប្រតិកម្ម​របស់​អ្នកនាំពាក្យ​ក្រសួងការពារជាតិ បាន​ធ្វើឡើង​បន្ទាប់ពី​អង្គការ​ខុមហ្វ្រែល រួមជាមួយ​នឹង សមាគម និង​អង្គការ​សង្គម​ស៊ីវិល​នៅ​កម្ពុជា នៃ​បន្ទប់​ស្ថានការណ៍​សម្រាប់​ការបោះឆ្នោត បានចេញ​សេចក្តីថ្លែងការណ៍ កាលពី​ថ្ងៃ​ពុធ អំពាវនាវ​ឱ្យ គ​.​ជ​.​ប ព្រមាន​ទៅលើ​មន្ត្រី​កងយោធពល​ខេ​មរ​ម​ភូមិន្ទ ដែល​បានប្រកាស​ចាត់វិធានកា​រលើ​បង្ក្រាប​ចំពោះ ការបង្ក​អសន្តិសុខ​សង្គម នៅ​អំឡុងពេល​បោះឆ្នោត​។ ក្រុម​អង្គការ​សង្គម​ស៊ីវិល​ទាំងនោះ បាន​សម្តែង​ការ ព្រួយបារម្ភ អំពី​ផលប៉ះពាល់​ដល់ ដំណើរ​ការរៀប​ចំការ​បោះឆ្នោត​ជ្រើសរើស​ក្រុមប្រឹក្សាឃុំ​-​សង្កាត់ ចំពោះ​សារ​ព្រមាន​របស់ មន្ត្រីជាន់ខ្ពស់​នៃ​កងយោធពល​ខេមរភូមិន្ទ នាពេលនេះ​។​
​នាយ​ឧ​ត្ត​ម​សេនីយ៍ ឈុំ សុជាតិ បានបញ្ជាក់​យ៉ាងច្បាស់​ថា សកម្មភាព និង​អនុសាសន៍​របស់​មន្ត្រីជាន់ខ្ពស់​នៃ​កងយោធពល​ខេមរភូមិន្ទ​កន្លងមក មិន​ប៉ះពាល់​ដល់​ការបោះឆ្នោត​ទេ វា​ជាការ​ជំរុញ​ដល់​ការការពារ​សន្តិសុខសម្រាប់​ការបោះឆ្នោត​នៅ​កម្ពុជា ដោយ​មិនឱ្យ​ជន​ណា​កេង​យក​ឱកាស​នេះ​បង្ក​អសន្តិសុខ បំផ្លាញ​សេចក្តីសុខ​របស់​ប្រជាជន​ខ្មែរ​ឡើយ​។​
​លោក​បាន​បន្ថែមទៀតថា ការលើកឡើង​របស់ មន្ត្រីជាន់ខ្ពស់​កងយោធពល​ខេមរភូមិន្ទ គឺជា​ការតម្រង់​ឆ្ពោះទៅរក​អ្នក​ដែល​ព្យាយាម បំផ្លាញ​សន្តិភាព និង​បង្កើត បដិវត្ត​ពណ៌​នៅ​កម្ពុជា​។ លោក​ថ្លែងថា កងទ័ព​កម្ពុជា មិន​គាំទ្រ​ចំពោះ​ទង្វើ​ខុសច្បាប់​ឡើយ មិនមែន​ត្រឹមតែ​ចំពោះ​កងទ័ព​នោះទេ បើ​ក្នុងករណី​មាន​ជន ទាំងឡាយណា ដែល​ធ្វើ​ខុស​នឹង​ច្បាប់​របស់​គ​.​ជ​.​ប ជន​ទាំងឡាយ​មាន​សិទ្ធិ​ប្តឹងតវ៉ា ទៅគ្រប់​ស្ថាប័ន​មាន​សមត្ថកិច្ច​៕

21345