ខេត្តរតនគិរី ៖ ទណ្ឌិតចំនួន៤នាក់ បានលួចរត់ចេញពីពន្ធនាគារភ្នំស្វាយដោយសុវត្ថិភាព កាលពីវេលាម៉ោង២ និង៣០នាទីយប់រំលងអធ្រាត្រឈានចូលថ្ងៃទី២៦ ខែឧសភា ឆ្នាំ២០១៧នេះ ស្ថិតនៅភូមិជ័យជំនះ សង្កាត់ឡាបានសៀក ក្រុងបានលុង។
បើតាមមន្ដ្រីពន្ធនាគាម្នាក់បានលួចបង្ហើបឲ្យដឹងថា ទណ្ឌិតចំនួន៤នាក់ ដែលលួចរត់ចេញពីពន្ធនាគារនេះ គឺជាប់ឃុំឃាំងពីបទចែកចាយ និងប្រើប្រាស់គ្រឿងញៀន ដែលតុលាការបានជំនុំជំរះរួចឲ្យជាប់ពន្ធនាគារយៈពេល២ឆ្នាំ។
ហើយរហូតមកដល់វេលាម៉ោង១១ព្រឹកថ្ងៃទី២៦ខែឧសភានេះ កម្លាំងអនុរក្សពន្ធនាគារ សហការជាមួយ កម្លាំងអធិការនរគបាលក្រុងបានលុង បានកំពុងឡោមព័ទ្ធក្បែរជើងភ្នំស្វាយ ស្ថិតនៅភូមិជ័យជំនះ សង្កាត់ឡាបានសៀក ក្រុងបានលុង។
ទណ្ឌិតចំនួន៤នាក់ ដែលលួចរត់ចេញពីពន្ធនាគាភ្នំស្វាយខាងលើនេះ ភា្នក់ងាររបស់យើងមិនទាន់ទទួលបានឈ្មោះ និងរូបភាពនៅឡើយទេ ដោយសមត្ថកិច្ចកំពុងជាប់រវល់តាមប្រមាញ់ ព័ត៌មានលំអិតនិងរាយការណ៍ជូននៅពេលក្រោយ។ ជុំវិញបញ្ហាទណ្ឌិតបានរត់រួចចេញពីពន្ធនាគារខាងលើនេះលោក ទិន សុវណ្ណនី ប្រធានពន្ធនាគារភ្នំស្វាយ ភ្នាក់ងារយើងមិនអាចសុំការបំភ្លឺបានទេនៅព្រឹកថ្ងៃទី២៦ខែឧសភានេះដោយទូរស័ព្ទចុចចូលមិនមានអ្នកលើក។
សូមបញ្ជាក់ថា ពន្ធនាគារភ្នំស្វាយមួយនេះមានទណ្ឌិតបានរត់រួចចំនួនពីរដងមកហើយដែរ ប៉ុន្តែកម្លាំងអនុរក្សជាច្រើននាក់ធ្វើឲ្យទណ្ឌិតរត់រួចបានទៀត នេះជាកំហុសរបស់ប្រធានពន្ធនាគារភ្នំស្វាយ មិនបានយកចិត្តទុកដាក់ឲ្យបានល្អនោះទេ៕
