ខេត្តមណ្ឌលគិរី ៖ ដំរីព្រៃមួយហ្វូងបានរត់ជាន់មនុស្សស្លាប់ម្នាក់ និងម្នាក់ទៀតរត់រួចខ្លួន ហេតុការណ៍នេះបានកើតឡើងនៅជិតក្រុមចុងរ៉ាង ភូមិពូហ្យាម ឃុំសែនមនោរម្យ ស្រុកអូររាំង នៅម៉ោង១រសៀលថ្ងៃទី៨ ខែមិថុនា ឆ្នាំ២០១៧ ។ មនុស្សម្នាក់ទៀតដែលឃើញហេតុការណ៍នោះបាននិយាយថា ពួកគាត់ទាំងពីរនាក់បានបណ្តើរឆ្កែដើរចូលទៅក្នុងព្រៃដើម្បីរកផ្សិត ស្រាបតែឃើញដំរីព្រៃមួយហ្វូងដេញឆ្កែ ពេលនោះសត្វឆ្កែរត់មករកម្ចាស់ ហើយដំរីក៏ដេញជាន់ម្ចាស់ស្លាប់តែម្តង។ ចំណែកមនុស្សម្នាក់ទៀតបានរត់ទៅហៅអ្នកភូមិ និងកងកម្លាំងដើម្បីជួយអន្តរគមន៍ តែអត់ទាន់ពេលវេលានោះទេ ពេលទៅដល់ស្រាប់តែឃើញជនរងគ្រោះស្លាប់បាត់ទៅហើយ ។
បើតាមសមត្ថកិច្ចបានអោយដឹងថា អ្នកស្លាប់ឈ្មោះ ស្រន ផ្យល ភេទប្រុស អាយុ៤៩ឆ្នាំ ជនជាតិព្នង រស់នៅភូមិក្រុមទី៧(យេស៊ូ) ភូមិពូហ្យាម ឃុំសែនមនោរម្យ បច្ចុប្បន្នសពជនរងគ្រោះត្រូវដឹកយកមកធ្វើបុណ្យប្រពៃណី៕
