ពលករ​ខ្មែរ​ធ្វើការ​នៅ​ប្រទេស​ថៃ​ស្រវឹងស្រា​កាប់​គ្នា​ស្លាប់​២​នាក់​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 14 July, 2017 ក+ ក-

​ប្រទេស​ថៃ ៖ ពលករ​ខ្មែរ​ដែល​កំពុងធ្វើការ​ងា​រ​នៅ​ប្រទេស​ថៃ ត្រូវបាន​គេ​រាយការណ៍​ថា បាន​កាប់ គ្នា​ស្លាប់​២​នាក់ ហើយ​ជនដៃដល់​បាននាំគ្នា​រត់គេចខ្លួន​បាត់​ស្រមោល ។ ហេតុការណ៍​នេះ​កើតឡើង​កាលពី​ពាក់កណ្ដាល​អធ្រាត្រ​ថ្ងៃទី​១១ ខែកក្កដា នៅក្នុង​ភូមិសាស្ត្រ​ខេត្ត​ស្រះកែវ ។ មូលហេតុ​នាំ​ឲ្យ​មានការ​កាប់សម្លាប់​គ្នា​នោះ​គឺ​បន្ទាប់ពី​ពួកគេ​នាំគ្នា​ផឹកស្រា​រហូត​ស្រវឹង​រៀងៗ ខ្លួន ហើយ​ទាស់សំដី​គ្នា ។​
​តាម​ប្រភព​ឱ្យដឹងថា បន្ទាប់ពី​កើតមាន​ឃាតកម្ម តម្រួត​និង​ទាហាន​ថៃ​បាន​ចុះ​ទៅដល់​កន្លែងកើតហេតុ ប្រទះឃើញ​សព​បុរស​មិន​ស្គាល់​អត្តសញ្ញាណ​ម្នាក់​ដេកស្លាប់​នៅ​កៀន​ខ្ទម​ស្រែ​មួយកន្លែង និង​សព​បុរស​ម្នាក់ទៀត​ឈ្មោះ​ជា ត្រូវគេ​ស្គាល់​ថា ជា​ពលករ​ខ្មែរ​បាន​ដេកស្លាប់​នៅក្នុង​វាលស្មៅ​ប្រហែល​៥​ម៉ែត្រ​ពី​សព​ទីមួយ ។ សមត្ថកិច្ច​ថៃ​បាន​ត្រួតពិនិត្យ​នៅ​ជុំវិញ​ខ្ទម​ស្រែ​នោះ​រកឃើញ​កាំបិត​ខ្វែវ​និង​ចបកាប់​ប្រឡាក់​ឈាម ក្តៅៗ​ព្រមទាំង​ដប​ស្រា​មួយចំនួន​ផង ។​
​តាម​ការត្រួតពិនិត្យ​នៅ​លើ​សាកសព​បុរស​ទាំងពីរ​នាក់ មាន​ស្លាកស្នាម​ត្រូវគេ​កាប់​នឹង​កាំបិត​វាយ​សំពង​នឹង​ចបកាប់​របួស​ជាច្រើន​កន្លែង ។ តាម​ការសន្និដ្ឋាន​រប​ស់​សមត្ថកិច្ច​ថៃ​បានឱ្យដឹងថា មុនពេល​កើតហេតុ ប្រហែលជា​អ្នកស្លាប់ និង​ជនដៃដល់​ផឹកស្រា​ជាមួយគ្នា តែ​ពេល​ស្រវឹង ក៏​កើតរឿង​ទាស់​ពាក្យសម្តី​គ្នា ទើប​ឈានដល់​ការកាប់សម្លាប់​គ្នា​យ៉ាង​ព្រៃផ្សៃ​បែបនេះ ។​
​ចំពោះ​ព័ត៌មាន​លម្អិត ទាក់ទង​ករណីនេះ​នៅ​មិនទាន់​បានដឹង​ច្បាស់​នៅឡើយ ហើយ​គ្រាន់តែ​ដឹងថា ជនដៃដល់​បាន​រត់​ចូលមក​ទឹកដី​កម្ពុជា​វិញ​ភ្លាមៗ បន្ទាប់ពី​កើតហេតុ ៕

6da43e6f-c925-4558-9bb0-ed71d8c4f890