កណ្តាល៖ បុរសម្នាក់ដែលមានមុខរបរជាមន្ត្រីអង្គភាពអគ្គនាយកដ្ឋាន ទូរទស្សន៏ជាតិកម្ពុជា (ទទក) នៃក្រសួងព័ត៌មាន ត្រូវបានសមត្ថកិច្ចនគរបាល ស្រុកលើកដែក ខេត្តកណ្តាល បានចាប់ខ្លួន ពាក់ព័ន្ធករណីប្រើប្រាស់រថយន្តដែលពាក់ស្លាកលេខនគរបាលក្លែងក្លាយ ឯកសណ្ឋាននគរបាល និងប្រើប្រាស់អាវុធខុសច្បាប់។
ករណីខាងលើនេះបានកើតឡើងនៅថ្ងៃទី០៧ ខែមីនា ឆ្នាំ២០១៥ វេលា ម៉ោង១និង៣០នាទីរសៀល នៅចំណុចកំពង់ចម្លងសាឡាងអ្នកលឿងត្រើយខាងលិច ស្ថិតនៅក្នុងភូមិកំពង់ចំលង ឃុំព្រែកទន្លាប់ ស្រុកលើកដែក ខេត្តកណ្ដាល។
នគរបានស្រុកលើកដែក បានឲ្យដឹងថា ជនសង្ស័យ ឈ្មោះ អូន ភាព អាយុ៤៧ឆ្នាំ នៅភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ជាមន្ត្រីអង្គភាពអគ្គនាយកដ្ឋាន ទូរទស្សន៏ជាតិ កម្ពុជា (ទទក) នៃក្រសួងព័ត៌មាន។
ក្នុងករណីនេះ សមត្ថកិច្ចដកហូតវត្ថុតាង រួមមាន៖ រថយន្តម៉ាក កាម៉ារី (បាឡែន) ពណ៌ខ្មៅ ផ្លាកលេខ នគរបាល 2.7272 ជារថយន្តគេចពន្ធមួយគ្រឿង។ អាវុធខ្លី ប៉េអាម៉ាប់ ចំនួន ០១ដើម គ្រាប់ចំនួន០ ៥គ្រាប់និងបង់០១។ លុយដុល្លារអាមេរិកចំនួន ៩០០ដុល្លារ លុយរៀល ៦.៨០០រៀល។ មួកនគរបាលចំនួន ០២។ មួកយោធាចំនួន ០១។ អាវនគរបាលពណ៌សដៃវែង ចំនួន ០១ មានពាក់ស័ក្តិ៣។ កាតាបពណ៌ខ្មៅចំនួន ០១។ កាបូបដៃចំនួន ០១។ ប័ណ្ណមន្ត្រីព័ត៌មានចំនួន ០២។ ប័ណ្ណចេញចូលចំនួន ០៣។ វិទ្យុ ID ចំនួន ០១ និងទូរស័ព្ទចំនួន ០២ គ្រឿង។
បច្ចុប្បន្នជនសង្ស័យ សមត្ថកិច្ចជំនាញ កំពុងសាកសួរ កសាងសំណុំរឿង នឹងចាត់ការទៅតាមនីតិវិធីច្បាប់៕
