ភ្នំពេញ៖មន្ដ្រីរាជការស៊ីវិលទាំងអស់នឹងត្រូវទទួលបានប្រាក់ឧបត្ថម្ភនៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរសម្រាប់ឆ្នាំ២០១៥នេះចំនួន ៤ ម៉ឺនរៀល ក្នុងម្នាក់ៗ។
យោងតាមអនុក្រឹត្យចេញដោយប្រមុខរដ្ឋាភិបាលលោកនាយករដ្ខមន្ត្រីហ៊ុន សែន ចុះហត្ថលេខានៅថ្ងៃទី០៦ ខែមីនា ឆ្នាំ២០១៥ បានឲ្យដឹង ថា រាជរដ្ឋាភិបាលសម្រេចផ្ដល់ប្រាក់ឧបត្ថម្ភ ក្នុងឱកាសបុណ្យ ចូលឆ្នាំថ្មី ប្រពៃណីជាតិខ្មែរ នៅឆ្នាំនេះ ចំនួន៤ម៉ឺនរៀល ក្នុងម្នាក់ៗ ជូនដល់មន្ដ្រីរាជការស៊ីវិល នៃក្រុមនីតិប្បញ្ញត្ដិ នីតិប្រតិបត្ដិ និងតុលាការ មន្ដ្រីនគរបាលជាតិកម្ពុជា យោធិននៃកងយោធពលខេមរភូមិន្ទ។
ក្រៅពីនេះសមាជិកក្រុមប្រឹក្សារាជធានី-ខេត្ដ ក្រុង ស្រុក ខណ្ឌ ឃុំ សង្កាត់ ប្រធានភូមិ អនុប្រធានភូមិ សមាជិកភូមិ មន្ដ្រីរាជការជាប់កិច្ចសន្យា និងបុគ្គលិកបណ្ដែត ដែលកំពុងបម្រើ ការងារនៅថ្នាក់ជាតិ និងថ្នាក់ក្រោមជាតិ ព្រមទាំងនិវត្ដជន ជនបាត់បង់សម្បទាវិជ្ជាជីវៈ ជនបាត់បង់សមត្ថភាពការងារ និងជន ពិការ ដែលជាអតីតមន្ដ្រីរាជការស៊ីវិល អតីតយោធិននៃកងយោពលខេមរភូមិន្ទ អតីតមន្ដ្រី នគរបាលជាតិកម្ពុជា ក៏ទទួលបានប្រាក់ឧបត្ថម្ភ៤ម៉ឺនរៀលនេះដែរ។
ការបើកប្រាក់ឧបត្ថម្ភខាងលើនេះ ត្រូវអនុវត្ដឲ្យបានមុនថ្ងៃចូលឆ្នាំថ្មីប្រពៃណីជាតិ ឆ្នាំមមែ សប្ដស័ក ពុទ្ធសករាជ២៥៥៩ និងគោរពតាមគោលការណ៍ដូចខាងក្រោម៖
១) ក្រសួង ស្ថាប័ន ដែលបានរៀបចំ ការបើកគណនីបៀវត្សជូនមន្ដ្រីរាជការ បុគ្គលិក និងភ្នាក់ងារសាធារណៈរបស់ខ្លួនរួច ហើយ ត្រូវធ្វើការបើកប្រាក់ឧបត្ថម្ភនេះ ចូលទៅក្នុងគណនីបៀវត្សរបស់សាមីជនម្នាក់ៗ ផ្ទាល់តែម្ដង។
២) ក្រសួង ស្ថាប័ន ត្រូវរៀបចំបើកគណនីបៀវត្សជូនមន្ដ្រីជាប់កិច្ចសន្យា និងបុគ្គលិក បណ្ដែតទាំងអស់ របស់ខ្លួនឲ្យបានរួចរាល់ និងត្រូវធ្វើការបើកផ្ដល់ប្រាក់ឧបត្ថម្ភ ទៅក្នុងគណនី បៀវត្ស របស់មន្ដ្រីជាប់កិច្ចសន្យា និងបុគ្គលិកបណ្ដែតម្នាក់។
៣) ក្រសួង ស្ថាប័ន និងអង្គភាព ដែលមិនទាន់បានបើកគណនីបៀវត្ស សម្រាប់មន្ដ្រីរាជការ បុគ្គលិក និងភ្នាក់ងារសាធារណៈរបស់ខ្លួន ត្រូវចាត់ចែងការបើកផ្ដល់ប្រាក់ឧបត្ថម្ភ ឲ្យបានដល់ដៃសាមីជនម្នាក់ៗ គ្រប់ចំនួន និងទាន់ពេលវេលា។
៤) និវត្ដជន ដែលជាអតីតមន្ដ្រីរាជការស៊ីវិល អតីតយោធិននៃកងយោពលខេមរភូមិន្ទ និងអតីតមន្ដ្រីនគរបាលជាតិកម្ពុជា ដែលកំពុងបំពេញការងារជាមន្ដ្រីជាប់កិច្ចសន្យា បុគ្គលិកបណ្ដែត សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ ប្រធានភូមិ អនុប្រធានភូមិ ឬសមាជិកភូមិ ត្រូវទទួលប្រាក់ឧបត្ថម្ភតែមួយកន្លែង ដែលចាត់ចែង ដោយក្រសួងសង្គមកិច្ច អតីតយុទ្ធជន និងយុវនីតិ សម្បទា។
៥) ក្រសួង ស្ថាប័ន ត្រូវទទួលខុសត្រូវ ក្នុងការពិនិត្យផ្ទៀងផ្ទាត់ រៀបចំសំណើ និងធ្វើការបើកប្រាក់ឧបត្ថម្ភ ដែលបានកំណត់ក្នុងអនុក្រឹត្យនេះ ដោយមិនរាប់បញ្ចូលមុខសញ្ញានិវត្ដជន ក្នុងចំណុចទី៤ខាងលើនេះ។
អនុក្រឹត្យរបស់រាជរដ្ឋាភិបាល បានបញ្ជាក់ ថា ក្រសួង ស្ថាប័នជាតិ និងរដ្ឋបាលថ្នាក់ក្រោមជាតិ ត្រូវលើកសំណើជាក់ស្ដែង អំពីចំនួនមន្ដ្រីរាជការដែលត្រូវ ទទួលប្រាក់ឧបត្ថម្ភក្រសួងសេដ្ឋកិច្ច និងហិរញ្ញវត្ថុ ជាការប្រញាប់ ដើម្បីក្រសួងសេដ្ឋកិច្ច និងហិរញ្ញវត្ថុ រៀបចំប្រកាសបន្ថែម ឥណទានថវិកាជូនទាន់ពេលវេលា និងធានាឲ្យការបើកប្រាក់ឧបត្ថម្ភនេះ អនុវត្ថបានទាន់ពេលវេលា៕
លោកនាយករដ្ខមន្ត្រី ហ៊ុន សែន បើកកិច្ចប្រជុំពេញអង្គគណៈរដ្ឋមន្ត្រី នៅវិមានរដ្ឋសភា
