បាងកក ៖ មន្ត្រីសន្តិសុខនៅក្នុងតំបន់នោះបាននិយាយថា ផ្ទុះគ្រាប់បែកតាមដងផ្លូវដែលបង្កៃដោយពួកអ្នកបះបោរមូស្លីមបានសម្លាប់មន្ត្រីអនុរក្សយោធា ៤ នាក់ និងរងរបួស ៦ នាក់រួមទាំងជនស៊ីវិលម្នាក់ផងដែរនៅភាគខាងត្បូងប្រទេសថៃកាលពីថ្ងៃសុក្រម្សិលមិញ។ មន្ត្រីដដែលបានឲ្យដឹងថាគ្រាប់បែកនេះត្រូវបានគេបង្កៃនៅក្រោមផ្លូវដែលកំពុងត្រូវបានសាងសង់នៅខេត្តប៉ាតានី ។
លោក Pramote Prom-in អ្នកនាំពាក្យកងកម្លាំងសន្តិសុខក្នុងតំបន់បាននិយាយថា “ក្រុមដែលបានបង្កៃគ្រាប់បែកនេះកំពុងប្រើបច្ចេកទេសចាស់ដើម្បីបង្កើតអស្ថេរភាពនៅក្នុងតំបន់ ។ ពួកគេបានបង្កៃគ្រាប់បែកនៅក្រោមផ្លូវដែលកំពុងសាងសង់” ។
ការផ្ទុះគ្រាប់បែកកាលពីថ្ងៃសុក្របានកើតឡើងបន្ទាប់ពីការផ្ទុះគ្រាប់បែកតាមដងផ្លូវកាលពីសប្ដាហ៍មុនដែលបានសម្លាប់ទាហានពីរនាក់ និងរងរបួសជាង ២០ នាក់នៅខេត្តយ៉ាឡា ។
ក្នុងនោះផងដែរមិនមានការទទួលខុសត្រូវចំពោះការផ្ទុះនេះឡើយដែលជាទូទៅកើតឡើងនៅភាគខាងត្បូងប្រទេសថៃដែលពួកអ្នកបះបោរកំពុងប្រយុទ្ធដើម្បីបំបែកខ្លួន ៕
