ខេត្តស្ទឹងត្រែង៖ មេឈ្មួញយ៉ាងសកម្មម្នាក់ឈ្មោះ សារ៉េត ដែលគេដឹងថាជាមេការឲ្យឧកញ៉ា គិត ម៉េង កំពុងតែបំពានច្បាប់ដោយចំហ ក្នុងការដើរប្រមូលទិញឈើពីឈ្មួញប្រជាពលរដ្ឋសមត្ថកិច្ចនៅក្នុងតំបន់ឧទ្យាន ជាតិវីរៈជ័យនិងមួយចំនួនទៀត ប្រមូលទិញពីតំបន់វរការពារព្រំដែនគោកលេខ១០១ ព្រំប្រទល់កម្ពុជា-ឡាវ យ៉ាងអនាធិបតេយ្យជ្រកក្រោមស្លាកអាជ្ញាប័ណ្ណស្តារបាតអាងវារីអគ្គិសនី ស្របច្បាប់របស់ក្រុមហ៊ុនឧកញ៉ា គិត ម៉េងនោះ។
មន្ត្រីអាជ្ញាធរមួយរូបសុំមិនបញ្ចេញឈ្មោះបានប្រាប់ឲ្យខឹងថា ជាទូទៅលោកសារ៉េត តែងប្រមូលទិញប្រភេទឈើប្រភេទ សុក្រំ ដែលមានមុខកាត់៣០សង់ទីម៉ែត្រ ប្រវែង២ទៅ៣ម៉ែត្រ ដឹកជញ្ជូនយកមកស្តុកទុកនៅចំណុចគល់ស្ពានស្រែពក ស្ថិតក្នុងស្រុកសេសាន ខេត្តស្ទឹងត្រែង បន្លំនឹងឃ្លាំងឈើស្របច្បាប់របស់ឧកញ៉ា គិត ម៉េង។
ប្រភពបន្តថា មេឈ្មញ សារ៉េត នេះបានឃុបឃិតជាមួយអាជ្ញាធរខេត្តស្ទឹងត្រែងមួយចំនួនដូចជា នាយខណ្ឌរដ្ឋបាលព្រៃឈើ ខេត្តស្ទឹងត្រែង រួមទាំងសមត្ថកិច្ចជំនាញជាច្រើនស្ថាប័នទៀត។ លោក សារ៉េត ខ្លួនងង ក៏ធ្លាប់បានអួតក្អេងក្អាងក្នុងការគំរាមកំហែងទៅលើអាជ្ញាធរ និងសមត្ថកិច្ច មន្ត្រីជំនាញតូចតាចដើម្បីកុំឲ្យមកប៉ះពាល់ចំពោះមុខជំនួញឈើល្មើសច្បាប់របស់ខ្លួន។
ប្រភពបន្តថា ការប្រមូលទិញឈើខុសច្បាប់មេឈ្មួញ សារ៉េត បានប្រើប្រាស់ឈ្មោះឧកញ៉ា គិត ម៉េង ដែលមានសិទ្ធិស្តារ បាតអាងដើម្បីប្រយោជន៍បុគ្គលខ្លួនឯង ក្នុងនោះសូម្បីតែលោក ឆេង គឹមសុន ប្រតិភូរាជរដ្ឋា ភិបាល ទទួលបន្ទុកប្រធានរដ្ឋបាលព្រៃឈើ ក៏ឈ្មួញរូបនេះមានអំនួតថា គ្មានសិទ្ធិបង្ក្រាប ទោះរូបគេដឹកជញ្ជូនឈើគ្មានច្បាប់ និងក៏ធ្លាប់បង់ប្រាក់សម្រាប់ជំនួញឈើនេះផងដែរ។ មេគង្គ ប៉ុស្តិ៍ បានព្យាយាមសុំការពន្យល់ពីលោក សារ៉េត និងពីមន្ត្រីជំនាញដទៃទៀតដែរ ប៉ុន្តែមិនអាចទាក់ទងបានកាលពីរសៀលម្សិលមិញនេះ៕
