ចាប់ តាំង ពីខែមិថុនា ឆ្នាំ២០១៤ ទីក្រុងទីគ្រីត ដែលស្ថិតនៅចំងាយ ប្រមាណជា១៦០គីឡូម៉ែត្រ ពីរដ្ឋធានីបាកដាត បានធ្លាក់ចូលទៅក្នុងការគ្រប់គ្រងរបស់ពួកជីហាតរដ្ឋអ៊ីស្លាម។ កងកម្លាំង រដ្ឋាភិបាលអ៊ីរ៉ាក់ ដោយមានការចូលរួម ពីក្រុមប្រយុទ្ធឈីអ៊ីតជាច្រើនក្រុមទៀត បានធ្វើការវាយបកយ៉ាងសកម្ម ក្នុងរយៈពេល ១០ថ្ងៃចុងក្រោយនេះ ហើយមកដល់ព្រឹកថ្ងៃព្រហស្បតិ៍នេះ កងកម្លាំងអ៊ីរ៉ាក់ បានចូលទៅដល់ភាគខាងជើងក្រុង ទីគ្រីតហើយ។
ទោះបីជាយ៉ាងណា មានការព្រួយបារម្ភថា ការប្រឈមមុខដាក់គ្នា នៅក្នុងក្រុងនេះ អាចនឹងបង្កឲ្យមាន អ្នកស្លាប់ច្រើន ខាងភាគីកងទ័ពអ៊ីរ៉ាក់ ដោយសារតែក្រុមជីហាតអ៊ីស្លាម បានបង្កៃគ្រាប់បែក ពាសពេញទីក្រុងនេះ។
តាម រយៈព័ត៌មានចុងក្រោយ ដែលទទួលបាន គឺកងទ័ពរដ្ឋាភិបាលអ៊ីរ៉ាក់ ទើបតែបាន វាយលុកចូលទៅដល់ភាគខាងជើង ក្រុងទីគ្រីតប៉ុណ្ណោះ។ វាមិនមែនមានន័យថា កងទ័ពអ៊ីរ៉ាក់ បានដណ្តើមយកទីក្រុងនេះ ទាំងមូលទេ។ ប៉ុន្តែអ្វីដែលធ្វើឲ្យគេមានការត្រេកអរ គឺដោយសារ ក្នុងរយៈពេល ១០ថ្ងៃចុងក្រោយនេះ កងទ័ពអ៊ីរ៉ាក់ មានសន្ទុះខ្លាំង ហើយបានវាយរំកិល យ៉ាងឆាប់រហ័ស ចូលទៅក្នុងក្រុង ទីគ្រីត ដែលស្ថិតក្រោមការកាន់កាប់ របស់ពួកជីហាតអ៊ីស្លាម តាំងពីខែ មិថុនាឆ្នាំទៅ ម្លេះ។
ក្រុងទីគ្រីត៖សមរភូមិគ្រោះថ្នាក់សម្រាប់កងកម្លាំងរដ្ឋាភិបាលអ៊ីរ៉ាក់
គ្រោះថ្នាក់នៅមានច្រើនទៀត សម្រាប់កងទ័ពអ៊ីរ៉ាក់ ព្រោះថាការប្រឈមមុខដាក់គ្នា នៅក្នុងទីក្រុងដែលមាន អាគារ មានផ្លូវក្រឡុកក្រលៀត វាខុសពីការបាញ់ដាក់គ្នា នៅតាមទីវាល ដែលយើងអាចមើលគ្នាឃើញ ដោយស្រួលៗ។ បើតាមការប៉ាន់ស្មាន កងទ័ពអ៊ីរ៉ាក់ មានច្រើនពាន់នាក់ ដែលបានចូលមកដល់ក្រុងទីគ្រីតនេះ ប៉ុន្តែពួកជីហាតអ៊ីស្លាម មានមិនច្រើនទេ ប្រមាណជា ៣ ទៅ ៤ រយនាក់ប៉ុណ្ណោះ។ គ្នាវាតិចជាងមែនពិត ប៉ុន្តែ ពួកនេះ មានល្បិចខ្ពស់ណាស់។ ពួកនេះ បានប្រើប្រាស់ អ្នកបាញ់កាំភ្លើង ស្នាយភើ ពីលើដំបូលផ្ទះ ហើយនិងដាក់គ្រាប់បែកបង្កៃ សឹងតែគ្រប់ទីកន្លែងទាំងអស់។ ដូច្នេះ កងទ័ពអ៊ីរ៉ាក់ត្រូវតែមានការប្រុងប្រយ័ត្ន ជាទីបំផុត ពុំនោះទេ ច្បាស់ជាស្លាប់គរជើងមិនខាន។
ជាក់ស្តែង គ្រាន់តែថ្ងៃពុធ ទី១២ មិនា នៅពេលដែល កងទ័ពអ៊ីរ៉ាក់ បានចូលមកដល់ជាយក្រុងទីគ្រីតភ្លាម មានឡានបង្កៃគ្រាប់បែក ផ្ទុះ ដល់ទៅ ១២ កន្លែង ខុសៗគ្នា ហើយក្នុងចំណោមនេះ មាន៧ ជាការបំផ្ទុះគ្រាប់បែកអត្តឃាត។ គ្រាន់តែថ្ងៃទីមួយ មានមនុស្សស្លាប់ ១៧នាក់ ហើយជាង៤០នាក់ទៀត របួសធ្ងន់ទៅហើយ។ ហើយបើទុកជាពួកជីហាតអ៊ីស្លាមចាញ់ នាំគ្នារត់ចេញពីក្រុងនេះ មុន នឹងចេញ ពួកនេះ ច្បាស់ជាកប់គ្រាប់បែក ទុកជាអនុស្សាវរីយមិនខានទេ។ ដូច្នេះ កងទ័ពអ៊ីរ៉ាក់ដែលបានជោគជ័យ ក៏មិនប្រាកដ ថារួចជីវិតដែរ។
វត្តមានរបស់អ៊ីរ៉ង់ ក្នុងកងទ័ពអ៊ីរ៉ាក់ អាចធ្វើឲ្យគេយល់ថា សង្គ្រាមជាមួយពួកជីហាតអ៊ីស្លាម ក្លាយជាសង្គ្រាមរវាងពួក ឈីអ៊ីត និងពួកស៊ុនីត៖
កងកម្លាំងអ៊ីរ៉ាក់បច្ចុប្បន្ននេះ មិនមែនសុទ្ធសឹងជាកងទ័ពរដ្ឋាភិបាល ទេ គឺមានការចូលរួម ពីកងកម្លាំងច្រើន មានទាំងក្រុមអ៊ីស្លាមនិកាយឈីអ៊ីត និងនិកាយស៊ុនីត។ មិនត្រឹមតែប៉ុណ្ណោះ កងទ័ពអ៊ីរ៉ាក់ ថែមទាំងមានជំនួយ ពីក្រុមអ្នកជំនាញយោធា មកពីអ៊ីរ៉ង់ទៀតផង។ ក្រសួងការពារជាតិអាមេរិក បានសម្តែងការព្រួយបារម្ភ ចំពោះវត្តមាន របស់ជំនាញការយោធាអ៊ីរ៉ង់ នៅក្នុងជួរងទ័ពអ៊ីរ៉ាក់។ តើហេតុអ្វីទៅ បានជាបារម្ភ ព្រោះថា អ៊ីរ៉ងមកចូលរួមដើម្បីវាយកម្ទេច ពួកជីហាតរដ្ឋអ៊ីស្លាម ទេតើ?
យើងអាចយល់បានថា អាមេរិកបារម្ភខ្លាចថា សង្គ្រាមរវាង កងទព័អ៊ីរ៉ាក់ ជាមួយពួកជីហាតរដ្ឋអ៊ីស្លាម ក្លាយជាសង្គ្រាមរវាងនិកាយ សាសនាអ៊ីស្លាម ទាំងពីរ គឺក្រុមឈីអ៊ីត និងក្រុមស៊ុនីត។ អាមេរិក ក៏ដូចជាបណ្តាប្រទេសធំៗ មានបារាំង អាល្លឺម៉ង់ អង់គ្លេស ជាដើម អំពាវនាវ នឹងខំប្រឹងប្រយុទ្ធដើម្បីកម្ទេច ក្រុមជីហាតអ៊ីស្លាមជ្រុលនិយម មិនមែនដោយសារពួកនេះ ជាពួកអ៊ីស្លាមនិកាយស៊ុនីតទេ។ គេមិនខ្វល់ថានរណា និកាយស្អីទេ សំខាន់ គឺពួកជីហាតរដ្ឋអ៊ីស្លាមនេះ វាសាហាវព្រៃផ្សៃ សម្លាប់មនុស្សគ្មាន ប្រណី មិនថាជនជាតិដទៃ រឺក៏អ្នកកាន់សាសនាអ៊ីស្លាមគ្នាវាទេ។
ប៉ុន្តែ នៅក្នុងផ្ទៃក្នុងសាសនាអ៊ីស្លាមទាំងមូល និកាយទាំងពីរនេះ ប្រខាំគ្នាសម្បើមណាស់។ នរណាក៏ដឹងដែរ ថាអ៊ីរ៉ង់ជាមេក្រុមអ៊ីស្លាមឈីអ៊ីត។ យ៉ាងណាមិញដើមហេតុ ដែលបណ្តាលឲ្យអ៊ីរ៉ាក់ ធ្លាក់ចូលភ្លើងសង្គ្រាម ជាមួយពួកជីហាតរដ្ឋអ៊ីស្លាម ក៏មួយផ្នែកធំ ដោយសារតែរដ្ឋាភិបាលអ៊ីរ៉ាក់ របស់អតីតនាយករដ្ឋមន្ត្រី លោក អាល់ម៉ាលីគី វាលម្អៀងទៅខាងពួកឈីអ៊ីតពេក។ ដូច្នេះហើយ ទើបពួកស៊ុនីត នៅអ៊ីរ៉ាក់ មួយចំនួនធំ នាំគ្នាចូលដៃ ជាមួយពួកជីហាតជ្រុលនិយម ព្រោះថា ពួកនេះ វាក៏កាន់និកាយស៊ុនីតដែរ។ ពួកនេះ ធ្វើសង្គ្រាមយ៉ាងពេញមុខតែម្តង ជាមួយកងទ័ពរដ្ឋាភិបាល អ៊ីរ៉ាក់ ដែលប្រកាន់និយាយឈីអ៊ីត។
ប៉ុន្តែកន្លងមក ខាងរដ្ឋាភិបាលអ៊ីរ៉ាក់ បានទទួលការគាំទ្រ ពីក្រុមស៊ុនីត ខ្លះៗដែរ ព្រោះថាមានមួយចំនួន ថ្វីត្បិតតែគេ ស៊ុនីតមែន តែគេមិនគាំទ្រនឹងនយោបាយព្រៃផ្សៃ សាហាវយង់ឃ្នង របស់ពួកជីហាតរដ្ឋអ៊ីស្លាមទេ។ ដូច្នេះហើយ បានជាពួកគេ មកចូលរួមជាមួយរដ្ឋាភិបាលអ៊ីរ៉ាក់ ដើម្បី កម្ទេចពួកនេះ។ ប៉ុន្តែមិនមែនមានន័យថា ក្រុមស៊ុនីត ទាំងនេះ មិនស្អប់ក្រុមឈីអ៊ីតទេ។
ឥឡូវនេះ មានអ៊ីរ៉ង់ មកចូលរួមក្នុងកងទ័ពរដ្ឋាភិបាលអ៊ីរ៉ាក់ វាអាច ធ្វើឲ្យក្រុមស៊ុនីត ដែលនៅក្នុងនឹងដែរ យល់ថា អ៊ីរ៉ង់ និងអ៊ីរ៉ាក់ ដែលសុទ្ធសឹង ជាពួកឈីអ៊ីតដូចគ្នា គេធ្វើការពួតដៃគ្នា វាយប្រយុទ្ធជាមួយក្រុមស៊ុនីត។ កន្លងមក ចំនុចក្តៅនៅតំបន់នេះ គឺដោយសារតែពួក អ៊ីស្លាមស៊ុនីត ចេះតែបារម្ភថា អ៊ីរ៉ង់ចង់ពង្រីកឥទ្ធិពលឈីអ៊ីតរបស់ខ្លួន នៅក្នុងតំបន់។ ដូច្នេះ ការបារម្ភរបស់អាមេរិក ត្រឹមត្រូវម្យ៉ាងដែរ ព្រោះថា វត្តមានរបស់អ៊ីរ៉ង់ ក្នុងកងទ័ពអ៊ីរ៉ាក់ អាចជំរុញក្រុមស៊ុនីត ដែលជួយច្បាំងខាងរដ្ឋាភិបាលអ៊ីរ៉ាក់ បាក់ទឹកចិត្ត លែងតស៊ូប្រយុទ្ធតទៅទៀត ហើយថាមិនត្រូវ គេអាចងៀកទៅ គាំទ្រក្រុមស៊ុនីតគ្នាគេ ក៏ថាបាន។
ស៊ុនីតក៏ដោយ ឈីអ៊ីតក៏ដោយ ត្រូវចាប់ដៃគ្នា កម្ទេចពួកជីហាតរដ្ឋអ៊ីស្លាម៖
ជម្លោះនិកាយសាសនាអ៊ីស្លាមទាំងពីរនេះ មានលក្ខណៈស្មុគស្មាញណាស់ ប៉ុន្តែអ្វីដែលជាដំណោះស្រាយបន្ទាន់គឺ ធ្វើយាងណា បោសសម្អាតពួកជីហាតរដ្ឋអ៊ីស្លាមឲ្យអស់។ បញ្ហានេះ ជាកិត្តិយសរបស់សាសនាអ៊ីស្លាមទាំងមូល។ បើយើងវិភាគឲ្យដិតដល់ទៅ ក្រុមជីហាតអ៊ីស្លាមជ្រុលនិយមនេះ ជា ក្រុមដែលព្រៃផ្សៃ ជាងសត្វតិរិច្ឆានទៅទៀត។ កុំថាឡើយ អ្នកកាន់សាសនាអ៊ីស្លាមទូទៅ សូម្បីតែ ពួកអ៊ីស្លាមនិកាយស៊ុនីត មួយចំនួន ក៏គ្មាននរណា គាំទ្រពួកជីហាតជ្រុលនិយមនេះដែរ។ ដូច្នេះ គេគួរទុកបញ្ហានិកាយ ស៊ុនីត និកាយឈីអ៊ីត មួយឡែក ហើយងៀកមកពួតដៃគ្នា កម្ទេចពួកជីហាតអ៊ីស្លាមនេះឲ្យអស់៕
