មនុស្ស​១៩​នាក់​ស្លាប់ និង​របួសក្នុងករណីផ្ទុះ​នៅ​រោងចក្រ​ផលិត​ឧស្ម័ន​​នៅ​អូទ្រីស​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 13 December, 2017

​អូទ្រីស ៖ មន្ត្រី​អាជ្ញាធរ​អូទ្រីស​បាន​និយាយថា មាន​ករណី​មួយ​បានកើត​ឡើង​នៅ​រោងចក្រ​ផលិត​ឧស្ម័ន​ធម្មជាតិ​ដ៏​សំខាន់​មួយ​នៅ​ជិត​ព្រំដែន​ប្រទេស​អូទ្រីស​ជាប់​នឹង​ប្រទេស​ស្លូ​វ៉ា​គី​បណ្ដាល​ឲ្យ​មនុស្ស​ម្នាក់​ស្លាប់ និង​ចំនួន​១៨​នាក់​ទៀត​បាន​រងរបួស​កាលពី​ម្សិលមិញ​។​
​ទីភ្នាក់ងារ​ព័ត៌មាន​មូលដ្ឋាន​បាន​រាយការណ៍​ថា មន្ត្រី​ពាក់ព័ន្ធ​បាន​បញ្ជូន​ឧទ្ធម្ភាគចក្រ​វេជ្ជសាស្ត្រ​ចំនួន​២​គ្រឿង​ទៅ​កន្លែងកើតហេតុ​។ មន្ត្រី​អាជ្ញាធរ​បាន​និយាយថា គ្រោះថ្នាក់​នេះ​បានកើត​ឡើង​ដោយសារ​បញ្ហា​បច្ចេកទេស ប៉ុន្តែ​មិនបាន​បញ្ជាក់​ច្បាស់​ដោយសារ​មន្ត្រី​អាជ្ញាធរ​កំពុងធ្វើការ​ស៊ើបអង្កេត​នៅឡើយ​។​
​សូមបញ្ជាក់ថា រោងចក្រ​ផលិត​ឧស្ម័ន​ធម្មជាតិ​នេះ​គឺជា​កន្លែង​បង្ហូរ​ឧស្ម័ន​ពី​ប្រទេស​រុស្ស៊ី ប្រទេស​ន័​រ​វែ​ស និង​ប្រទេស​មួយចំនួនទៀត ហើយ​រោងចក្រ​នេះ​ក៏​ជា​កន្លែង​ដ៏​សំខាន់បំផុត​មួយ​សម្រាប់​ផ្គត់ផ្គង់​ឧស្ម័ន​នៅ​អឺរ៉ុប​ផងដែរ​៕