ខេត្តប៉ៃលិន៖ បុរសម្នាក់ បានរងរបួសធ្ងន់ធ្ងរ ដោយសារតែខ្លាឃ្មុំមួយក្បាលវាយប្រហារនៅកណ្តាលព្រៃ នៃជួរភ្នំទ្រព្យ ក្នុងខេត្តប៉ៃលិន ខណៈដែលរូបគាត់កំពុងដើរតាមមាត់អូរ សំដៅទៅខ្ទមរបស់ខ្លួនស្នាក់នៅ ។ ហេតុការណ៍ខាងលើនេះ បានកើតឡើងជាងមួយសប្តាហ៍កន្លងទៅ តែទើបបានដឹងដល់អ្នកសារព័ត៌មាន ស្ថិតចំណុចជួរភ្នំទ្រព្យ នៃក្រុងប៉ៃលិន ខេត្តប៉ៃលិន ។
បើតាមបុរសចំណាស់ឈ្មោះ សិទ្ធ ខេត្រ អាយុ៥៣ឆ្នាំ ជាជនរងគ្រោះ មានស្រុកកំណើតនៅខេត្តកំពង់ស្ពឺ ដែលបច្ចុប្បន្នរស់នៅទីតាំងខាងលើ បានរៀបរាប់ឲ្យភ្នាក់ងារយើងដឹងថា៖ មុនពេលកើតហេតុរូប បានដើរមកពីរកត្រី ដោយដើរសរសៀរតាមដងអូរ លើចំណុចជួរភ្នំទ្រព្យ ក៍ប្រទះឃើញសត្វខ្លាឃ្មុំមួយក្បាល ទម្ងន់ជាង១០០គឺឡូរក្រាម បានបោលសំដៅមករកគាត់ រួចខាំលើរូបគាត់ ធ្វើឲ្យគាត់ខំប្រឹងរើបម្រាស់ពេញទំហឹង ប៉ុន្តែមិនអាចយកឈ្នះសត្វខ្លាឃ្មុំនោះបានឡើយ ។ រូបគាត់ បានបន្តថា៖ សត្វខ្លាឃ្មុំ ដែលខាំគាត់គឺហាក់បីដួចជាខឹងពីណាមកអញ្ចឹង ដោយខាំរហូតដល់រូបគាត់ ធ្វើជាសន្លប់ ទើបវាឈប់ខាំ ព្រោះប្រសិនជាគាត់រើរត្រង់កន្លែងណាគឺវាខាំត្រង់កន្លែងនោះ ហើយក្នុងការវាយប្រហារបស់ខ្លាឃ្មុំនោះគឺបណ្តាលឲ្យគាត់រងរបួសពេញរាងកាយ ក្បាល ផ្ទៃមុខផងដែរ ។ គាត់បន្តទៀតថា៖ បន្ទាប់ពីគាត់ធ្វើសន្លប់គឺសត្វខ្លាឃ្មុំ វានៅតែឈរទន្រាំលើទ្រូង របស់គាត់រហូតលេងរើ ទើបវាដើរចេញ ក្រោយមកដោយឃើញវាដើរចេញឆ្ងាយហើយ រូបគាត់ក៍ខំប្រឹងដើរទៅមុន ដើម្បីស្វែងរកការជួយសង្គ្រោះពីមន្ត្រីអភិរក្សបរិស្ថានខេត្ត ឬប្រជាពលរដ្ឋនៅទីនោះ រហូតដល់ចំងាយផ្លូវជិតម្ភៃគឺឡូរម៉ែត្រ ទើបប្រទះឃើញបងប្អូនប្រជាពលរដ្ឋ ក៍ដឹកមកសង្គ្រោះនៅមន្ទីរពេទ្យបង្អែកខេត្តប៉ៃលិន តែម្តង ។
ពាក់ព័ន្ធបញ្ហាខាងលើនេះដែរ ត្រូបបានលោក គឹម សុខា ប្រធានមន្ទីរបរិស្ថាន ខេត្តប៉ៃលិន មានប្រសាសន៍ឲ្យដឹងតាមទូរស័ព្ទកាលពីវេលាម៉ោង១៩និង១៥នាទីយប់ថ្ងៃទី២៨ ខែធ្នូ ឆ្នាំ២០១៧ថា៖កន្លងមកក្រុមល្បាត់នៃមន្ត្រីអភិរក្សមន្ទីរបរិស្ថានខេត្ត ធ្លាប់ប្រទះឃើញជាច្រើនដងមកហើយ មានពេលខ្លះក៍ត្រូវខ្លាឃ្មុំវាយប្រហា មកលើក្រុមការងារល្បាតរបស់លោកដែរ ជួនកាលជួបរហូតដល់បីទៅបួនក្បាលឯណោះ ។ លោកប្រធាន បន្តថា៖ បើនិយាយពីសត្វខ្លាឃ្មុំ ដែលមាននៅខេត្តប៉ៃលិនគឺប្រហែល២០ក្បាល ដែលរស់នៅតំបន់ភ្នំទ្រព្យ ភ្នំផល្លីផល្លាជាដើម ហើយចំពោះបុរសចំណាស ដែលរងការវាយប្រហាពីខ្លាឃ្មុំនោះ ជូនកាលគាត់ជាអ្នកដាក់អន្ទាក់ ដោយបានមេខ្លាឃ្មុំ ប៉ុន្តែមានអាឈ្មោលនៅទីនោះឮ ក៍មកជួយគ្នាវា ទើបបានជាវាខឹងវាយប្រហាបុរសនោះទៅ នេះបើតាមការឲ្យដឹងពីមន្ត្រីរបស់លោក ។ បច្ចុប្បន្នបុរសរងគ្រោះខាងលើ បានធូរស្រាលបណ្តើរៗហើយដែរ(បទសម្ភាសលោក គឹម សុខា ប្រធានមន្ទីរបរិស្ថានខេត្តប៉ៃលិន) ៕ 
