សៀមរាប ៖ អាជ្ញាធរខេត្តសៀមរាបស្នើឲ្យមន្ត្រីពន្ធនាគារទាំងអស់ត្រួតពិនិត្យឆែកឆេរឲ្យបានគ្រប់ជ្រុងជ្រោយនូវរាល់សម្ភារៈ ដែលត្រូវបានអនុញ្ញាតឲ្យជនជាប់ឃុំរក្សាទុក ប្រើប្រាស់ នៅក្នុងបន្ទប់ឃុំឃាំង ជៀសវាងមានការដាក់បន្លំវត្ថុហាមឃាត់ ដែលធ្វើឲ្យមានបញ្ហានៅក្នុងបន្ទប់ឃុំឃាំង ឬអ្នកជាប់ឃុំ។ថ្លែងនៅក្នុងពិធីផ្សព្វផ្សាយបទបញ្ជាផ្ទៃក្នុងពន្ធនាគារខេត្តសៀមរាបនៅព្រឹកច័ន្ទ៧រោជខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៨ ខែមករា ឆ្នាំ២០១៨នេះ លោក ពៅ ពិសិដ្ឋ អភិបាលរងខេត្តសៀមរាបបានមានប្រសាសន៍ថា ដើម្បីធានាដល់ការរក្សាសន្តិសុខ សុវត្ថិភាពសណ្តាប់ធ្នាប់ សុខភាព និងមនុស្សធម៌ក្នុងការគ្រប់គ្រងពន្ធនាគារ និងដើម្បីធានាដល់ការអនុវត្តកម្មវិធីអប់រំកែប្រែ ស្តានីតិសម្បទា និងការធ្វើសមាហរណកម្មជនជាប់ឃុំទៅក្នុងសង្គមវិញ ក្រសួងមហាផ្ទៃបានកំណត់អំពីបទបញ្ជាផ្ទៃក្នុងពន្ធនាគារថ្មី។
លោកបានបន្តថា នៅក្នុងប្រការ១០ នៃបទបញ្ជាផ្ទៃក្នុងនេះ បានអនុញ្ញាតឲ្យជនជាប់ឃុំរក្សាទុក សម្ភារៈប្រើប្រាស់ផ្ទាល់ខ្លួនដូចជា ស្បែកជើង ក្រមា មុង ភួយ ថ្នាំដុសធ្មេញ និងច្រាសដុសធ្មេញជាដើម នៅក្នុងបន្ទប់ឃុំឃាំង។ ពាក់ព័ន្ធសម្ភារៈផ្ទាល់ខ្លួននេះ លោកស្នើឲ្យមន្ត្រីពន្ធនាគារត្រួតពិនិត្យឆែកឆេរឲ្យបានគ្រប់ជ្រុងជ្រោយជៀសវាងមានការដាក់បន្លំវត្ថុហាមឃាត់ដូចជាគ្រឿងញៀនទូរស័ព្ទជាដើម ជាពិសេសនៅពេលដែលបងប្អូនជនជាប់ឃុំយកសម្ភារៈប្រើប្រាស់ និងចំណីអាហារមកឲ្យជនជាប់ឃុំ គឺត្រូវត្រួតពិនិត្យបានខ្ពស់បំផុត ព្រោះវាអាចធ្វើឲ្យមានបញ្ហានៅក្នុងបន្ទប់ឃុំឃាំង និងពន្ធនាគារទាំងមូល។
លោក ពៅ ពិសិដ្ឋ បានបញ្ជាក់ថា កន្លងមកនៅតាមពន្ធនាគារមួយចំនួនបានមានបញ្ហានេះកើតឡើង ដោយសារតែការគ្រប់គ្រងរបស់មន្ត្រីពន្ធនាគារមានការធ្វេសប្រហេស។
លោក តាន់ ឆវ័ន្ត ប្រធានពន្ធនាគារខេត្តសៀមរាបបានប្តេជ្ញាថា នឹងខិតខំអនុវត្តការងារនេះឲ្យអស់ពីលទ្ធភាព។លោកបានបញ្ជាក់ថា កន្លងមកបញ្ហាការលួចដាក់វត្ថុហាមឃាត់ នៅក្នុងសម្ភារៈប្រើប្រាស់ និងចំណីអាហារមកឲ្យជនជាប់ឃុំ ក៏ធ្លាប់មានខ្លះៗដែរតែត្រូវបានមន្ត្រីពន្ធនាគារត្រួតពិនិត្យឆែកឆេរចាប់បានទាំងអស់។
នៅក្នុងពិធីនេះដែរ លោក តាន់ ឆវ័ន្ត បានព្រមានដល់មន្ត្រីក្រោមឱវាទរបស់ខ្លួនបើមានមន្ត្រីណាបណ្តោយឲ្យមានបញ្ហានេះកើតឡើងលោកមិនអនុគ្រោះឲ្យនោះទេ។ហើយពីថ្ងៃនេះទៅមន្ត្រីពន្ធនាគារទាំងអស់ត្រូវពង្រឹងការត្រួតពិនិត្យឆែកឆេរឲ្យបានគ្រប់ជ្រុងជ្រោយ និងតឹងរឹងបំផុត៕
