ភ្នំពេញ ៖ តាមការគ្រោងទុក តុលាការកំពូល នឹងបើកសវនាការរឿងក្តីជនជាប់ចោទលោក គឹម សុខ នៅព្រឹកថ្ងៃទី១០ ខែមករា ឆ្នាំ២០១៨ ស្អែកនេះ លើសំណុំរឿងប្តឹងជំទាស់ ទៅនឹងការសម្រេច របស់តុលាការក្រុងភ្នំពេញ និងសាលាឧទ្ធរណ៍ ពាក់ព័ន្ធនឹងករណីចោទប្រកាន់ថា គណបក្សប្រជា ជនកម្ពុជា ជាអ្នកសម្លាប់លោក កែម ឡី ។
យោងតាមដីកាកោះហៅជនជាប់ចោទលោក គឺម សុខ ដែលបណ្តាញសារព័ត៌មានទើបទទួលបាននៅរសៀលថ្ងៃទី០៩ ខែមករា នេះ បានឱ្យដឹងថា សវនាការនេះ ដឹកនាំដោយលោកស្រី គិម សត្ថាវី ជាប្រធានក្រុមប្រឹក្សាជំនុំជម្រះ និង លោក ឈួន ចាន់ថា ជាតំណាងមហាអយ្យការ ។
សូមជម្រាបថា បច្ចុប្បន្នលោក គឹម សុខ នៅជាប់បណ្តឹងមួយទៀត ដែលប្តឹងដោយសម្តេចតេជោដូចគ្នា គឺពាក់ព័ន្ធនឹងករណីដែលលោក គឹម សុខ បានចោទប្រកាន់ថា រាជរដ្ឋាភិបាលកម្ពុជាបានបង្កើតប្រព័ន្ធសម្លាប់មនុស្ស រួចរកឃាតកមិនដែលឃើញ។
គួររំឭកថា លោក គឹម សុខ ធ្លាប់ត្រូវបានសាលាដំបូងរាជធានីភ្នំពេញ និងសាលាឧទ្ធរ ណ៍ សម្រេចចោទប្រកាន់ពីបទ”ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទបរិហារកេរ្តិ៍ជាសាធារ ណៈ តាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ ដោយផ្តន្ទាទោសដាក់ ពន្ធនា គារ លោក គឺម សុខ ចំនួន១៨ខែ ពិន័យជាប្រាក់ចំនួន៨លានរៀល និងសងជំងឺចិត្តដល់សម្តេចតេជោនាយករដ្ឋមន្ត្រីកម្ពុជា ដែលជាដើមបណ្ដឹងរដ្ឋប្បវេណី ចំនួន ៨០០លានរៀល ៕