ភ្នំពេញ ៖ រដ្ឋបាលគយជប៉ុនគ្រោងនឹងផ្តល់នាវាល្បាតពីរគ្រឿងជូនរដ្ឋបាលគយ និងរដ្ឋាករកម្ពុជា នៅក្នុងកំឡុងខែមិថុនា ឆ្នាំ២០១៨ខាងមុខនេះ រួមនិងការផ្តល់គម្រោងជំនួយប្រព័ន្ធស្វ័យប្រវត្តិកម្មផងដែរ ដែលដំណឹងស្តីពីការផ្តល់ជំនួយនេះត្រូវបានលើកឡើងក្នុងជំនួបពិភាក្សារវាងលោកបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា ជាមួយលោក លីហ្ស៊ុយកា អាសឺហ៊ី អគ្គនាយកនៃរដ្ឋបាលគយជប៉ុន នាទីស្តីការក្រសួងកាលពី រសៀលថ្ងៃទី៩ មករា។
ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ក្នុងនាមរាជរដ្ឋាភិបាលកម្ពុជាបានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះកិច្ចសហប្រតិបត្តិការល្អរវាងប្រទេសទាំងពីរលើ គ្រប់វិស័យក្នុងការជួយស្តារ កសាង និងអភិវឌ្ឍន៍ប្រទេសកម្ពុជា ជាពិសេសការផ្តល់ជំនួយបច្ចេក
ទេសក្នុងការអនុវត្តកម្មវិធីកំណែទម្រង់ និងទំនើបកម្មរបស់រដ្ឋបាលគយ និងរដ្ឋាករកម្ពុជាតាំងពីឆ្នាំ១៩៨៩មក។ ជាមួយគ្នានេះលោករដ្ឋមន្ត្រីបានថ្លែងអំណរគុណចំពោះការផ្តល់នាវាល្បាតពីរគ្រឿងរបស់រដ្ឋបាលគយជប៉ុនជូនរដ្ឋបាលគយ និងរដ្ឋាករកម្ពុជា រួមនឹងការផ្តល់ជំនួយលើគម្រោងប្រព័ន្ធស្វ័យប្រវត្តិកម្មរបស់ជប៉ុនផងដែរ ដែលជាការផ្លាស់ប្តូរប្រព័ន្ធស្វ័យប្រវត្តិកម្មគយដែលបាន និងកំពុងប្រើប្រាស់ដោយរដ្ឋបាលគយ និងរដ្ឋាករកម្ពុជា និងធុរជនអស់រយៈពេលជិត ១០ឆ្នាំ ។ លោកថា ការផ្លាស់ប្តូរប្រព័ន្ធនេះគឺជារបត់មួយសំខាន់ដែលតម្រូវឲ្យមានការពិនិត្យ វាយតម្លៃឲ្យបានម៉ត់ចត់ និងច្បាស់លាស់គ្រប់ជ្រុងជ្រោយ។ លើសពីនេះលោក អូន ព័ន្ធមុនីរ័ត្ន ក៏បានស្នើពន្លឿនការរៀបចំសេចក្តីព្រាងអនុស្សរណៈយោគយល់គ្នារវាងរដ្ឋបាលគយទាំងពីរ ដើម្បីពង្រឹង និងលើកកម្ពស់កិច្ចសហប្រតិបត្តិការរវាងរដ្ឋបាលគយនៃប្រទេសទាំងពីរ ។
អគ្គនាយករដ្ឋបាលគយជប៉ុនលោក លីហ្ស៊ុយកា អាសឺហ៊ី បានជម្រាបជូនលោក អូន ព័ន្ធមុនីរ័ត្ន ថា ក្នុងដំណើរទស្សនកិច្ចនេះគណៈប្រតិភូគយជប៉ុនក៏បានជួបពិភាក្សាការងារជាមួយលោក គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ដើម្បីពិភាក្សាការងារគយមួយចំនួនក្នុងគោលបំណង ពង្រឹង និងពង្រីកកិច្ចសហប្រតិបត្តិការឲ្យកាន់តែជិតស្និទ និងមានប្រសិទ្ធភាពរវាងរដ្ឋបាលគយ ទាំងពីរផងដែរ៕
