បន្ទាយមានជ័យ៖ យុវជនម្នាក់បានរងរបួសធ្ងន់ និងដាច់ជើងស្តាំ ដោយ សារតែគេកាន់ចំពៀមកៅស៊ូដើរបាញ់សត្វតាមអូរព្រំដែនកម្ពុជា-ថៃ មិនស្គាល់ភូមិសាស្ត្រជាន់មីន។ហេតុការណ៍នេះ កើតឡើង នៅវេលាម៉ោង១១និង១០នាទី ព្រឹកថ្ងៃទី២៣ ខែមីនា ឆ្នាំ២០១៥ នៅចំណុចអូរព្រំដេនខ្មែរ-ថៃ ចំងាយ៣០០ម៉ែត្រពីភូមិបឹងតាស្រី ឃុំគោករមៀត ស្រុកថ្មពួក ខេត្តបន្ទាយមានជ័យ ។
នគរបាលរដ្ឋបាលប៉ុស្តិ៍គោករមៀត បានប្រាប់ឲ្យដឹងថា ជនរងគ្រោះដែលជាន់ មីនដាច់ជើងខាងស្តាំនោះឈ្មោះ លី រដ្ឋ ភេទប្រុស អាយុ២០ឆ្នាំ រស់នៅភូមិកសិណ ខាងត្បូង ឃុំគោកចក ស្រុកសៀមរាប ខេត្តសៀមរាប។
ប្រភពបន្តឲ្យដឹងទៀតថា នៅមុនពេលកើតហេតុជនរងគ្រោះខាងលើបានមកស្នាក់នៅ និងលេងសៀកលក់ ថ្នាំបូរាណ នៅក្នុងវត្តបឹងតាស្រីនេះ ហើយក៏បានកាន់ចំពាមកៅស៊ូដើរ រកបាញ់សត្វ ដើរបាន៣០០ម៉ែត្រពីភូមិ ដល់ចំណុចអូរព្រំដែនខ្មែរថៃក៏ជាន់មីនបណ្តាលឲ្យ ដាច់ជើងនិងរបួសធ្ងន់តែម្តង។ ក្រោយហេតុការណ៍អ្នកស្រុកបានរាយការណ៍ឲ្យសមត្ថកិច្ច ចូលទៅជួយសង្គ្រោះនិងដឹកបញ្ជូនជនរងគ្រោះទៅសម្រាកព្យាបាលនៅក្នុងមន្ទីរពេទ្យបង្អែកស្រុកថ្មពួកផងដែរ៕
