ក្រសួង​ពាក់ព័ន្ធ គ្រោង​ស្នើ​ទៅ​សភា​ឱ្យ​កែប្រែ​ច្បាប់​ដើម្បី​ការពារ​ព្រះមហាក្សត្រ​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 13 January, 2018

ភ្នំពេញ ៖ ដោយ​មើលឃើញថា អង្គ​ព្រះមហាក្សត្រ​កំពុង​ត្រូវបាន​រំលោភបំពាន ឬ​ការប្រមាថ​ពី បុគ្គល​មួយចំនួន​ដែល​មិនអាច​ទទួលយកបាន និង​ជាការ​ផ្ទុយ​ពី​រដ្ឋធម្មនុញ្ញ​ដែល​ចែងថា ព្រះ មហាក្សត្រ​មិនអាច​នរណា​រំលោភបំពាន​បានឡើយ​នោះ នៅពេលនេះ​បណ្តា​ក្រសួង​ស្ថាប័ន ពាក់ព័ន្ធ​ទាំងឡាយ​កំពុងធ្វើការ​សិក្សា​អំពី​ទិដ្ឋភាព​ច្បាប់​ដើម្បី​ស្នើសុំ​រដ្ឋសភា​ធ្វើការ​កែប្រែ​ច្បាប់ មួយចំនួន​ដើម្បី​ប្រសិទ្ធភាព​ជាង​មុន​ក្នុងការ​ការពារ​អង្គ​ព្រះ​មា​ហា​ក្សត្រ​ពី​ការរំលោភបំពាន និង ការប្រមាថ​នានា​ដែល​ផ្ទុយ​ពី​រដ្ឋធម្មនុញ្ញ​។​
សមាជិក​រដ្ឋសភា​មកពី​ខាង​គណបក្ស​ប្រជាជន​កម្ពុជា​មួយរូប​គឺ​ឯកឧត្តម ឈាង វុន នា​ព្រឹក​ថ្ងៃទី​១២​ខែមករា​នេះ​មានប្រសាសន៍ប្រាប់​អ្នក​សារ​ព័​ត៍​មាន​ថា ទាំង​រាជរដ្ឋាភិបាល ទាំង រដ្ឋសភា​គឺមាន​ឆន្ទៈ​ខ្ពស់បំផុត​ក្នុងការ​ការពារ​ព្រះ​កិត្តិយស ព្រះកិត្តិនាម​អង្គ​ព្រះមហាក្សត្រ ជា ពិសេស​ការការពារ​ព្រះរាជ​ប​ល័​ង្គ​ស្របតាម​គោលការណ៍​នៃ​របបរាជានិយម​ដែល​កម្ពុជា​កំពុង ប្រកាន់យក​នាពេល​បច្ចុប្បន្ន​នេះ​៕